Kuthenjiswa into yamehlo emcimbini weJazz ofolose ngoLira eKurhuleni
EMUVA kwesikhathi eside exinwe ukugula, uLerato Moipone Molapo odume ngelikaLira uzobonakala enza adume ngazo emcimbini weJazz i-10th Business Premium Jazz Festival ezoba ngomhlaka-24 Mandulo (September) 2025 eKurhuleni.
Lo mcimbi owenziwe waqondana nosuku lokugubha amasiko kuhloswe ngawo ukusebenzisa umculo ukuhlanganisa izizwe ezihlukene ndawonye, ukuqhakambisa isitayela nomoya wobu-Afrika.
Abazowuhambela bagqugquzelwa ukuthi begqoke izimpahla ezikhangisa ngesintu okuhlanganisa imvunulo nezinye izevatho ezibonisa umhlaba ngokuziqhenya kwethu ngesiko.
Kuzonikwa ithuba nabafuna ukudayisa imikhiqizo yabo yobuciko eqhakambisa ubuzwe namasiko ehlukene.
ULira ongumzwilili othandwayo nasemazweni aphesheya uyena okufoloswa ngaye kulo mcimbi okungangabezi ukuthi uzohamba phambili ekhalendeni yemicimbi kuleli.
Bakhona nabanye abaculi basekhaya abazobe beshiyelana inkundla, bejabulisa izinkumbi zabantu okulindeleke ukuthi ziwuhambele.
Ekhuluma neziko lezindaba, u-Richard Ramudzuli oyinhloko kwinkampani ehlela umcimbi uthe lo mcimbi awukho mayelana nobumnandi kuphela.
“Lo mcimbi awukho mayelana nomculo nobumnandi kuphela kodwa uwukuthokozela amandla, ukuzazi nobuhle bokupheleliswa”, kusho yena.
“Ukuthola uLira ukuthi azonandisa ngakubo ngosuku lwamagugu kusho lukhulu kithi nakubantu esibenzela umcimbi. Kuzoba umzuzu wokulapheka, ukuziqhenya nentokozo – hhayi kuyena kuphela kodwa kuwo wonke umuntu ogqugquzelwa uhambo lwempilo yakhe.
“Sifuna imvunge yalo mcimbi isabalale i-Ekurhuleni yonke nasezweni lonke njengophawu lwethemba nokuziqhenya ngesiko”, kusho uRamudzuli.
Kulindeleke abantu abangaphezu kwezinkulungwane ezintathu (3000) kulo mcimbi, nokuhloswe ngawo futhi ukufukula umnotho wendawo nezokuvakasha esifundeni.
Abahleli bawo bathe ubeka i-Ekurhuleni endaweni enhle futhi eyigqamisa njengenkundla ekhulayo yezobuciko bendawo nomculo.
Iziteshi sikamabonakude, i-BET Africa ne Primedia Broadcasting bazobe bekhona, ukuqinisekisa ukuthi intandokazi yabantu, uLira ubonwa futhi ulalelwa kuzo zonke izindawo kuleli nasemhlabeni.
