ISOWETO CENTRAL CHORUS IZOKHIPHA INGOMA NE-LADYSMITH BLACK MAMBAZO
IQEMBU lo mculo eselizakhele igama ngokucula ngokuhlanganyela nabaculi abadumile kuleli, iSoweto Central Chorus lizokhipha ingoma enesihloko esithi Usuku Oluzayo ngokubambisana neqembu elidume umhlaba wonke i-Ladysmith Black Mambazo. Le ngoma elindelwe ngabomvu ingezinye leli qembu eliziqhenyayo ngokuzenza libambisene nabaculi abahlonishwayo kuleli.
Le ngoma izophuma ngoLwesihlanu, mhlaka-25 Mfumfu emcimbini ose-Rockets Rooftop 86 eGoli abantu abazobe bezitika kuwona ngomculo we-Soweto Central ne-Ladysmith Black Mambazo.
Kulo mculo kuzophinde kubonakale inkakha yezomculo esihlabene ngenqwaba yezindondo kuma-Grammy Awards, u-Terrace Martin nomdidiyelo womculo ohlonishwayo uNdabo Zulu, nokunguye obambe iqhaza elikhulu ekulungiseleni ukukhishwa kwale ngoma.
Isithombe: Amaqembu omculo i-Soweto Central Chorus ne Ladysmith Black Mambazo belungiselela ukukhishwa kwengoma ethi Usuku Oluzayo
I-Soweto Central Chorus engaphansi kwebandla i-The Salvationa Army isike yenza izingoma nabaculi abehlukene abafana noNtokozo Mbambo, Nqubeko Mbatha, Khaya Mthethwa nabanye abaningi. Ukuhlanganyela ne-Ladysmith Black Mambazo kuvula esinye isahluko esiwubufakazi bokuzinikela kwalo ekungeneni kuzo zonke izinhlobo zomculo. UZulu okunguye obambe iqhaza elikhulu ekuhlanganiseni umculo kuleli qembu, unolwazi olunzulu emculweni njengoba eseke wasebenza nezingwazi zomculo emazweni aphesheya futhi waklonyeliswa amahlandla amaningi yi-Southern African Music Rights Organisation (SAMRO) ne-South African Music Awards (SAMA’s).
