Ungcwatshwe njengeqhawe uNandi Nyembe ofe ebalisa ngokuxakeka

UBUNGAPHIKA ukuthi ngaphambi komngcwabo wakhe bekusolwana ukuthi ubani okwaze ukumsiza esaphila nongakwazanga, nemizuliswano yokuqoqwa kweminikelo yokumngcwaba umlingisi oqavile kuleli, uNandi Nyembe ongcwatshwe njengeqhawe.

Inkonzo yomngcwabo wakhe ibibanjelwe e-Walter Sisulu Hall, e-Randburg, eGoli.

UNyembe ushone ngoMgqibelo odlule eseneminyaka engamashumi ayisikhombisa nanhlanu (75) emuva kokubanjwa ukugula okuze kwamhlalisa esihlalweni esihambayo.

Udlale emidlalweni ehlukene kamabonakude kuhlanganisa neYizo Yizo, Soul City, Zone 14, Isibaya, House of Zwide ne-Adulting.

Zonke izikhulumi ezinikwe ithuba lokwethula izinkulumo zichaze uNyembe njengomuntu obezimisela emsebenzini wakhe. Esinye sezikhulumi kube umlingisi obengumngani omkhulu kaNyembe, uThoko Ntshinga ocele amaciko ukuthi abhekane nezinselelo ezihlasele umkhakha wawo.

Uchaze uNyembe njengenkakha kwezokulingisa aqale ukuyazi ngama-1970’s esafuna amatoho.

“Angifuni ukukhuluma nohulumeni. Sesikhulume kakhulu naye, sesibalisile. Sesicelile. Sesikhalile. Ngifuna ukukhuluma namaciko. Siwuthathela nini phezulu umsebenzi wethu? Uma ubona ukuthi uzokhokhelwa imali encane ungawuthathi lowo msebenzi. Umkhakha wethu uwumsebenzi ofana nayo yonke eminye.

“Kungani sivumela ukuphathwa kabi kanje? Kufanele sibambisane. Uma senza umsebenzi owodwa futhi kukhona esifuna ukukwenza ngawo njengamaciko kumele sibambisane”, kusho uNtshinga.

Imbongi yesizwe, uMzwakhe Mbuli uhaye inkondlo eyenze kwaba nomunyu kubantu abebegcwele phama ehholo. Komunye ulayini uthe: “Ukube amafosholo ayakhuluma ngabe ayasho manje ukuthi akhathele ukumbela abantu”.

UNyembe ungcwatshwe emathuneni ase-Westpark Cemetery khona e-Randburg ngoMgqibelo ntambama.