Onontandakubukwa bakuleli bayaxolisa ngokuholela ophathe intsha ngolwemisebenzi yase-Russia

UKUZIBANDAKANYA konontandakubukwa bakuleli ekukhangiseni uhlelo olungundabamlonyeni olubizwa nge-Alabuga Start Programme sekuqubule umsindo ezinkundleni zokuxhumana njengoba besolwa ngokuholela ophathe intsha esafuna impilo engcono.

Ukusolwa kwabo sekuholele ekutheni bephumele obala bexolise ngokuziphatha kwabo.

Abanye balabo nontandakubukwa abaphumele obala baxolisa ngalokhu oSiyamthanda Anita odume ngelika Sprinkles no DJ Cyan Boujee nabo abafake ama-video bekhangisa lolu hlelo.

Emuva kokusabalala kwalolu daba ezinkundleni zokuxhumana abantu besola laba ngokuzihlanganisa nento eyingozi bengayiqinisekisanga, uSiyamthanda ufake i-video ekhasini lakhe le-Tiktok echaza kabanzi ngephutha alenzile ngokuzihlanganisa ne-Alabuga Start Programme.

Uthe uyazisola ngokungalucwaningisisi loluhlelo ngaphambi kokulukhangisa, nokuthi asebenzise ikhasi lakhe le-YouTube ukubonisa abantu ngezinto angazazi zase-Russia.

“Ezinyangeni ezedlule ithimba lezokukhangisa le-Alabuga Start Programme lixhumane nami ngenhloso yokuthi sisebenzisane, lathi kunethuba lomsebenzi kubantu abasha baseNingizimu Afrika futhi bafuna ukusebenzisana nathi njengabantu abalandelwa kakhulu ezinkundleni zokuxhumana.

“Ngokuvamile kufanele wenze ucwaningo uma uthola ingqayizivele yethuba elikanje. Mina angenzanga okutheni okuyikho okuholele ekutheni ngingene kulolu gibe. Ngiyaxolisa kakhulu”, kusho uSiyamthanda.

Ufake ingxoxo yakhe ekhuluma nalo leli thimba le-Alabuga elibuza ukuthi kungani befuna abantu abaneminyaka ephakathi kwengu-18 no 22. Ubachazele ukuthi ezweni lakhe abantu abakuleminyaka akusibo abangafuna ngaleyo ndlela ukushiya amakhaya beye phesheya, hlampe kungaba abadala kunabo.

Uthe uphinde walibuza leli thimba ukuthi kungani lifuna abesilisa kuphela, liyeka abesilisa, nokuyilapho limphendule khona ngokusolisayo kodwa wanganaka.

U-DJ Cyan Boujee ongu-Honor Zuma igama lakhe langempela naye ubhalile emakhasini akhe ezinkundleni zokuxhumana exolisa ngokuzibandanya nalolu hlelo.

Yena unabalandeli abangu-900 00 ku-Instagram futhi unabangu-1.7 million ku-Tiktok bonke ababonile ekhangisa i-Alabuga Start Programme. Kodwa useyisule imibhalo ebikhangisa kuyo lolu hlelo.

Uthe uyazi ukuthi kubucayi kangakanani akwenzile futhi ithimba lakhe liyaxoxisana nabe-Alabuga Start Programme futhi ulinde izimpendulo zalo ngaphambi kokukhipha esinye isitatimende esizoba nemininingwane eminingi.

“Bengilokhu ngithule ngoba bengilinde ukuthi kube yibo abakhipha isitatimende behlanze igama lami kodwa bathule abasho lutho, bangichithela isikhathi.

Ukushushumbiswa kwabantu udaba olubucayi futhi angihambisani nakho. Ngikholwa ukuthi ngifundile kakhulu ngokwenzekile futhi nabanye bafundile”, kusho yena.

Abanye onontandakubukwa bakuleli okuvele ukuthi bekhangise o-Ghost Hlubi (Khanya Hlubi), Seemah (Sima Mangolwane), no Zillewizzy (Khathutshelo Netshitomboni)

Isikhulu somnyango wezobudlelwano namazwe omhlaba nokuxhumana, uMnuz. Clayson Monyela utshele intatheli ye-702 uBongani Bingwa ukuthi amathuba amaningi okuya emazweni angaphandle kuba kancane engahlangene nokushushumbiswa kwabantu.

Uma abantu sebefika ezweni okuyiwa kulo, ama-passport ayathathwa, behlaliswe ezindaweni ezingekho esimeni esihle futhi abavunyelwa ukuxhumana namalungu eminindeno yabo uma kwenzeka kuvunywa bayagadwa ukuthi bakhulumani nawo. Iyaqedwa inkululeko yomuntu.

UMonyela ubhale ekhasini lakhe ku-X exwayisa intsha, ikakhulu yesifazane ukuthi iqaphele ingagaxeli ogibeni lwalemisebenzi engaqinisekisiwe.

I-Crimewatch_RSA nayo ibhale ku-X yathi i-Alabuga Start Programme ingaphansi kophenyo olunzulu.