Obengumsebenzi kwa-Cellucity “uhlanziswa” R50 million awehlise ngomlenze wase esula enkampanini

OWESIFAZANE wase-Cape Town obizwa ngo-Sharlene Phillipson-Garcia useyalelwe inkantolo i-Western Cape High Court ukuthi akhokhe imali engu-R50.68 million emuva kokutholakala ukuthi webe u-R70 million kwinkampani edayisa omakhalekhukhwini abengumsebenzi wayo, i-Cellucity.

Lenkampani ithole ngalo mkhonyovu kafushane nje esulile njenge -Assistant Finance Manager.

Usule emsebenzini ngoNtulikazi (July) 2024 esesebenze iminyaka engu-16. Ubhale incwadi yokusula emsebenzini nge-email emuva kokubuzwa ngezimali ezingaqondakali ezivela emabhukwini enkampani abenziwa uyena.

Kubikwa ukuthi Phillipson-Garcia uthathe ngokuhlukana imali yakwa-Cellucity engu-R6.9 million, R6.2 million, R2 million, R9.15 nenye imali okungacaci ukuthi yenzeni wayifaka emabhizinisini omndeni i-Basic Blue Trading 450 (elakhe), Ohana Beuaty & Wellness (elomshana) ne Little Phase (elendodakazi). Wenza konke lokhu nje inkampani ibimholela R41 500 njalo ngenyanga.

Ngesikhathi esebanjiwe ukuthi ubentshontshela inkampani usulile njengomqondisi emabhizinisini omndeni wase ethutha yonke imali ebikuma-account awo wayifaka ku-account yendodana yakhe.

Nakuba evumile uPhillipson-Garcia ukuthi ikhona imali ayehlise ngomlenze kodwa utshele inkantolo ukuthi kunemali engu-R9.2 million ayisebenzise ukukhokhela amakhasimende abekweletwa i-Cellucity. Nokho ijaji Gavin Cooper uthe lokho kusazohlolwa ngoba ayaziwa amakhasimende abekweletwa inkampani futhi izinkampani athi uzikhokhele imali nazo zingase zibhekane nokuhlolwa ukuthi bezingasetshenziswa yini njengeqhinga lokushintshiselana ngemali entshontshiwe.

Leli cala liyaqhubeka ngomhlaka-5 Lwezi (November) 2026.