Kuvulwe amahhovisi kanokusho eMangosuthu Buthelezi Foundation eThekwini
UNDUNANKULU wesifundazwe saKwaZulu-Natali, uMnuz. Thami Ntuli uthule inkulumo yosuku kuvulwa ngokusemthethweni amahhovisi kanokusho e-Prince Mangosuthu Buthelezi Foundation aku-05 Signal Road, Waterfront eThekwini ngoMgqibelo, mhlaka-30 Ncwaba (August) 2025.
Esithombeni: Bekuvulwa ngokusemthethweni kwamahhovisi e-Prince Mangosuthu Buthelezi Foundation eThekwini
Kuzokhumbuleka ukuthi ngoMandulo (September) 2022 kwethulwe ngokusemthethweni i-Prince Mangosuthu Buthelezi Foundation e-Durban ICC lapho bekunezicukuthwane ezibalulekile kuhlanganisa nowayengumengameli waseZambia, uDkt. Kenneth Kaunda.
Emcimbini obunamuhla bekukhona abaholi abehlukene bakahulumeni okuhlanganisa ungqongqoshe wezokubusa ngokubambisana nezindaba zomdabu kuzwelonke, uMnuz. Velenkosini Hlabisa, usekela ngqongqoshe womnyango wezokuthutha uMnuz. Mkhuleko Hlengwa, umphathiswa womnyango wezolimo KwaZulu-Natali uNkk. Thembeni Madlopha-Mthethwa, iNkosi Zuzifa Buthelezi – oyindodana kaShenge nabanye abaningi.
Esithombeni: Abaholi abebekhona kuvulwa amahhovisi e-Prince Mangosuthu Buthelezi Foundation
Ukuvulwa kwalamahhovisi kuza emuva komcimbi obungoLwesithathu emzini wakwaPhindangene, oLundi lapho bekwethulwa ngokusemthethweni kwedlinza likaMntwana wakwaPhindangene njengendawo yamagugu yesifundazwe.
UButhelezi uhlonishwa ngeqhaza alibambe emzabalazweni wenkululeko yabantu abampisholo nangeqhaza alibambe embusweni wakwaZulu njengoba eqophe umlando ngokuba undunankulu weZilo ezintathu zesizwe samaZulu.
Ube ngundunankulu weSilo u-Cyprian Bhekuzulu KaSolomon, uZwelithini KaBhekuzulu noMisuzulu KaZwelithini.
Ukhothame mhlaka-9 Mandulo 2023, okuqondane noMkhosi Womhlanga ogujwa isizwe samaZulu.
UMntwana wakwaPhindangene ubeyiNkosi yesizwe sakwaButhelezi eMahlabathini, oLundi aphinde abe umengameli we-Inkatha Freedom Party.
