Usolwa ngokugxambukela emsebenzini wamaphoyisa ungqongqoshe omusha
UKUPHUMELA obala agxeke ukubuyiselwa emuva KwaZulu-Natali kwamadokodo angu-121 ophiko oluphenya amacala okubulawa kosopolitiki kukangqongqoshe omusha wamaphoyisa, uSolwazi Firoz Cachalia sekwenze abantu bakuleli bamsole ngokugxambukela ekusebenzeni kwamaphoyisa.
USol. Cachalia usole umkhuzi wamaphoyisa kuzwelonke, u-General Fanie Masemola ngokuthathela izinto phezulu ngodaba lophiko lwamaphoyisa aphenya amacala okubulawa kosopolitiki.
Uthe kuyamkhathaza okushiwo u-General Masemola ngoLwesine kwabezindaba ngokubuyiselwa kwamadokodo KwaZulu-Natali.
Uthe ukholwa ukuthi akufanele lolu daba lusetshenzwe lodwana, ngaphandle kwekhomishani kaMadlanga.
Uthe ufuna uMasemola amnike umbiko ngalolu phiko.
Kuzokhumbuleka ukuthi ngomhlaka-6 Ntulikazi (July) 2025 umkhuzi wamaphoyisa esifundazweni saKwaZulu-Natali, u-Lt. Gen. Nhlanhla Mkhwanazi watshela izintatheli ezazihlangene enhloko-hhovisi yamaphoyisa eThekwini ukuthi ungqongqoshe wamaphoyisa uMnuz. Senzo Mchunu uyingxenye yegunundu lezigebengu elisebenza nezikhulu zamaphoyisa e-SAPS kuhlanganisa nakamasipala waseGoli, Tshwane nowase-Ekurhuleni.
Ube esesola uMchunu ngokugxambukela ekusebenzeni kwamaphoyisa ngokuyalela ukuba kuhlakazwe uphiko obeluphenya amacala okubulawa kosopolitiki futhi wathi akuthathwe onke amadokodo aloluphiko aKwaZulu-Natali ayiswe eGauteng.
“Ngizithatha njengezibucayi kakhulu izinsolo ezenziwe ngophiko oluphenya amacala okubulawa kosopolitiki futhi ziwudaba olubhekwe umphakathi. Lolu phiko lusegudwini lwezinsolo ezenziwa uMkhwanazi ngakho kufanele zisetshenzwe ikhomishani.
“Kuyakhathaza ukuthi kube neminyakazo eyenziwa ngalo ekubeni ikhomishani ingakaphenyi ngokusebenza kwalo. Sengicele umkhuzi wamaphoyisa kuzwelonke ukuze anginike umbiko ngokushesha”, kusho uSol. Cachalia.
Emuva kokuthi umengameli wezwe uMnuz. Cyril Ramaphosa esungule ikhomishani kaMadlanga ezophenya kabanzi ngezinsolo ezenziwe uMkhwanazi ngoMchunu, ube esenikwa ikhefu [uMchunu].
Abantu ezinkundleni zokuxhumana baphawulile emakhasini ehlukene ezinkundleni zokuxhumana ngenkulumo kaSol. Cachalia bemsola ngokugxambukela ekusebenzeni kwamaphoyisa.
“Kwangathi naye uphakathi”, kusho uLondeka Nuh Mthembu ekhasini likaSthembiso Mngoma.
Omunye ophawule kuleli khasi uFezeewe Empie Dlakadla othe: “Uthunyiwe lona”
UMandla Mhlongo III uthe: “Ufunani emsebenzini wamaphoyisa?”
“Lo ngqongqoshe obambile uyasolisa”, kusho uPhila Mthembu.
Omunye umfundi we-IOL News uthe: “Kungani egxambukela ekusebenzeni kwamaphoyisa?”.
“Manje kufanele kume yonke into, kulindwe ikhomishani? Kuzothiwani uma le khomishani kuphela iminyaka emihlanu ingawuqalile umsebenzi. Shuthi le khomishani izothatha umsebenzi we-SAPS ne NPA?”, kusho uLikhanye Kushinda Ngudle ekhasini le-IOL News.
