Uxolise kubalandeli bakhe “ngokuzibulala” ngokhisimuzi owe Moja Love TV
OBENGUNKOSIKAZI kaMaseko, oyinyanga eganwe isithembu samakhosikazi namadoda ohlelweni oluvela kuMoja Love oluthi Umndeni, u-Flora “Mahlalentabeni” Makena wenze i-video exolisa kubalandeli bakhe futhi wachaza ngokumenze wafuna ukuzibulala ngomhlaka-25 Zibandlela (December) 2025.
I-Sunday World ibike ukuthi umndeni kaMahlalentabeni ngeSonto, mhlaka-28 Zibandlela uqinisekise amahlebezi abesesabalele ezinkundleni zokuxhumana okuthi uzibulele.
Kube sekuthi ngoMsombuluko, mhlaka-29 Zibandlela wabe usulushintsha udaba emuva kokuba evuke egunjini labagula kakhulu esibhedlela okube sekudalulwa ukuthi udle uphoyizeni ngenhloso yokuzithuma uphuthu.
Kune-video egcwele ezinkundleni zokuxhumana lapho Mahlalentabeni exolisa khona kubalandeli bakhe ngokuzama ukuzibulala.
“Ngizicabangele mina, ngiyaxolisa kakhulu ngengikwenzile. Bengingaqondile ukuniphatha kabi. Uma ningaqaphela ama-video ami ebengiwafaka ku-TikTok, nizonaka ukuthi abantu bebebhala izinto ezibuhlungu kanjani.
“Ngaleso sikhathi ngizamile ukuziqinisa kodwa kwasho ukuthi ngiwumuntu, ngahluleka” kusho yena.
Uthe ukuhluleka ukumelana nokuphawula kwabantu kumholele ekutheni akhethe ukuzibulala. Uthe ama-video abewafaka ku-TikTok ezama ukuchaza ukuthi isiteshi iMoja Love simkweleta imali engakanani futhi esingafuni ukumkhokhela yona abebucayi kakhulu.
“Bengifuna ukuthola usizo kunoma ubani ongangisiza. Ngeke ngingene ezinkundleni zokuxhumana ngikhulume amanga ngento ebucayi kanje futhi engizwisa ubuhlungu”, kuphetha yena.
