UMusa Khawula waboshelwa amanqina enyathi u-Gen. Sibiya emuva kokubika “ngabangathintwa”

KUYAQHUBEKA ukuvela kobufakazi obushaqisayo kuMadlanga Commission ephenya izinsolo ezenziwa umkhuzi wamaphoyisa KwaZulu-Natal, u-Lt. Gen. Nhlanhla Mkhwanazi ngokugxambukela kosopolitiki emsebenzini wamaphoyisa zokusebenzisana kwabo negunundu lezigebengu okuhlanganisa namaphoyisa e-SAPS nakamasipala wase-Ekurhuleni naseGoli kanjani nokugwamandwa kwezobulungiswa.

Kuleli sonto kuphinde kwavela ubufakazi obushaqisayo ngofakazi obebizwa ngo-Witness F, oninde isekela lomkhuzi wamaphoyisa kuzwelonke elisamisiwe, u-General Shadrack Sibiya.

NgoLwesithathu u-Witness F utshele iMadlanga Commission u-Major General Richard Shibiri uyena owayexhumana nombhali wezindaba zosaziwayo ezinkundleni zokuxhumana uMusa Khawula.

Kuzokhumbuleka ukuthi uKhawula waboshwa wangathola ngisho i-bail ecaleni asolwa kulo ngokubulala isoka lakhe.

Ikhomishani izwe ukuthi uShibiri wayalela uKhawula ukuthi apheze ukubhala izindaba ngosomabhizinisi osolwa ngobugebengu uVusimuzi “Cat” Matlala.

U-Witness F uthe uShibiri wamfundisa imiyalezo yakhe noKhawula. Akuqaphela ukuthi isexwayiso ayesinika uKhawula ukuthi ayeke ukubhala ngoMatlala sasingaveli kuye kodwa sasivela kubaphathi.

Uthe ngendlela okusetshenzwa embuthweni kwamkhanyela ukuthi lo myalelo wawuvela kuSibiya, okuwuye owamnika incwadi yokubopha uKhawula waze wathi ayibonise noMatlala yize wayengekho emsebenzini ngalelo langa.

Eqhubeka nobufakazi uthe uSibiya waphinde wamfonela wamtshela ukuthi ungaphansi kwengcingezi evela kosopolitiki, athe kwakubandakanyeka isekela likangqongqoshe wamaphoyisa, uMnuz. Cassel Mathale.

U-Witness F uthe konke lokhu kwakulandela umbiko owabhalwa uKhawula ekhasini lakhe le-X, lapho ayesola khona unkosikazi kanobhala we-ANC, uFikile Mbalula, uNozuko Mbalula ngenkohlakalo ka-R150 million ayenza ehlangene nomunye wesifazane ongusomabhizinisi, uMichelle Perrow.

UKhawula waphinde wenza imibiko eminingi ku-X lapho ayesola khona uMatlala nomkakhe, u-Cordelia Matlala ngobugebengu nenkohlakalo obuhlanganisa inkampani yonogada i-CAT Vip Protection Services.

Kulemibiko uKhawula wayesola uMatlala ngokuthinteka enkohlakalweni eyenzeka esibhedlela, iTembisa Hospital eGoli, ukushushumbisa izidakamizwa okwakufaka phakathi u-DJ Sumbody nokuthinteka kwakhe ekubulaweni kukaBabita Deerkam.

Ikhomishani izwe ukuthi emuva kwalemibiko kaKhawula amaphoyisa abe esembopha ngaphansi komthetho i-Cybercrime Act kanye nokudicilela phansi isithunzi. Asebenzisa inkampani kaMatlala, i-CAT Vip Protection Services ukulandela uKhawula njengoba kwakunguMatlala owayezazi zonke izindawo azihambelayo ngezimpelasonto.

U-Witness F uthe incwadi yokubopha uKhawula wayibonisa uMatlala kuphela ngoba wayezitshela ukuthi usebenza ngokomyalelo osemthethweni. Nokho ikhomishani ikuvezile ukuthi lesi ngesinye sezigameko ezishaqisayo zokunikwa kolwazi olubucayi lwamaphoyisa kumuntu nje ongelona.