Umthamo wabalaleli usinde i-website yeGagasi FM kuhlukaniswa unyaka

IGAGASI FM selikhiphe isitatimende licacisa ngobuhixihixi obenzekile abalaleli bengakwazi ukuzwa lomsakazo ngesikhathi kunempi phakathi kwalo noKhozi FM ngohlelo lokuwelela onyakeni omusha.

Uhlelo lweGagasi lungene ngehora lesishiyagalolunye ebusuku (21:00) okuyisikhathi esifanayo okungene ngaso oloKhozi FM.

OlweGagasi FM belusakazwa yinkakha yomsakazi obeyisimenywa, uLinda “Mr Magic” Sibiya no Selby “Selbeyonce” Mkhize bobabili abebengabasakazi boKhozi FM. Uhlelo loKhozi FM lona belusakazwa isibabuli somsakazi, uKhathide “Tshathugodo” Ngobe noSthandwa Nzuza obuye umlingisi.

Ngaphambi kokungena kwalezinhlelo kube nesasasa kubalaleli beklodelana ngokuthi iluphi uhlelo abazolulalela. Iningi belijabuliswa ukulandwa kukaSibiya yiGagasi FM.

Ezinsukwini ngaphambi kosuku olukhulu kumiswe emoyeni amasonto amabili umethuli wohlelo lwasekuseni phakathi nezinsuku, uFelix Hlophe emuva kwe-video esabalele ezinkundleni zokuxhumana abevela kuyo esezinxushunxushwini zangasese.

Abalaleli bezwakalise ukudumala ezinkundleni zokuxhumana bethi abakwazi ukulalela isiteshi kwi-app yaso. Umhleli woMKHAYA uke wazama ukulalela lomsakazo kule-app emuva kokuvula umsakazo wahlohloza ngenxa yokungadonsi kahle kwesiteshi endaweni abekuyo, kodwa kwangangeneka.

Esitatimendeni esikhishwe iGagasi FM lithe liyazi ngobunzima elibhekene nabo ngenxa yomthamo ophezulu wabantu abalalele.

“Ithimba lethu lisebenza ngokuzikhandla ukulungisa le nkinga. Siyaxolisa ngokuphazamiseka okube khona. Okwamanje sidlala bukhoma ekhasini lethu le-Facebook,” kusho isitatimende seGagasi FM.

Lomsakazo uhlukanise unyaka ngengoma ka-DJ Tira ethi Awungazi, ayenza ko-Pcee ne CampMasters abapike kuyo uGeneral C’mamane.