“Ukufa” kukaMthethwa esanda kusolwa kuMadlanga Commission kushiya imibuzo engaphenduleki

NGESIKHATHI elakuleli lisashaqekile ngokudlula emhlabeni kwenxusa lakuleli e-France, uMnuz. Nathi Mthethwa sekuvuke inqwaba yemibuzo engaphenduleli kwazise akukapheli nesonto umkhuzi wamaphoyisa KwaZulu-Natali, u-Lt. Gen. Nhlanhla Mkhwanazi atshela iMadlanga Commission ukuthi uMthethwa wagxambukela ecaleni elikhulu lenkohlakalo.

UMkhwanazi utshele lekhomishani ukuthi ngo 2011 uMthethwa waphoqa i-Auditor General yophiko lwe-crime intelligence kuleli, u-Advocate Faith Radebe ukuba ahoxise ukuphenya icala lenkohlakalo elalibhekene no-Lt. Gen. Richard Mdluli owayeyinhloko ye-crime intelligence ngaleso sikhathi.

UMdluli wayesolwa ngokuzisavunela imali elinganiselwa ku-R200 million ngokungekho emthethweni esikhwameni salolu phiko esiyimfihlo sokugcina izinto ezithile nokwavela ukuthi lemali ayeyisavuna kulesikhwama wayetetemuka ngayo eya emaholidini akhe angasese phakathi kuka-2008 no 2012.

Ngalesosikhathi uMkhwanazi wayeselibamba likaKhomishana wamaPhoyisa kuzwelonke.

UMthethwa utholakale eseshonile ebaleni lehhotela elise-Paris ngoLwesibili ntambama nokusolwa ukuthi uthanqazeke phansi esuka phezulu ku-22nd floor nokuyilapho afe khona ujuqu.

Ihhovisi lomshushisi omkhulu e-Paris libikele abezindaba ukuthi ngaphambi kokuba atholakale uMthethwa umkakhe ubafonele wabatshela ukuthi uthole umyalezo kuye emazisa ukuthi ufuna ukufa ngokuzibulala.