Seyidlule nabane (4) ingozi yomgwaqo ku-N3 ngase-Bergville

NAKUBA uhulumeni eqhubeka nemikhankaso eqwashisa ngokuphepha emgwaqeni, izingozi nazo ziyaqhubeka isonto nesonto emigwaqeni yakuleli.

Umnyango wezokuthutha esifundazweni saKwaZulu-Natali usanda kubika ngengozi eyenzeke emgwaqeni u-N3 lapho kushayisene khona iloli netekisi ebilayishe abantu ngase-Bergville.

Lo mnyango uthi usuthumele ithimba elizohlonza imindeni yabadlule kule ngozi enyantisa igazi.

Ngesonto eledlule ngawo uMgqibelo, kwenzeke enye ingozi ehlanganisa iloli nemoto encane emgwaqeni u-N2 phakathi kwaseDokodweni naseMatigulu.

Kule ngozi kushone amalungu omndeni owodwa amahlanu (5) azongcwatshwa ngeSonto nomshayeli weloli.