Inkakha yoKhozi FM isizobangena eGagasini

KUNGAKAPHELI nasikhathi esingakanani seliphinde latheza futhi iGagasi FM emsakazweni omkhulu kuleli, Ukhozi FM njengoba selulande inkakha yomdidiyeli wezinhlelo uThozama Ngwenya.

Kuzokhumbuleka ukuthi iGagasi FM lisanda kuba sematheni ngokulanda isikhwishikhwishi somsakazi Okhozini, u-Selby “Selbyonce” Mkhize obenza iWoza Nabangani Bakho noKhathide “Tshatha” Ngobe.

Njengamanje u-Selbyonce wenza i-Fastlane no-DJ SPHECTacula no DJ Naives phakathi nezinsuku ntambama.

Lesiteshi siyaqhubeka nokukhubaza Ukhozi FM njengoba sesiluphuca injini yomdidiyeli wezinhlelo angangatshazwa amagalelo ayo.

UThozama ubedidiyela izinhlelo zangempelasonto, olungena ngoLwezihlanu iFakumoya olwenziwa u-DJ Zeal odume ngelikaMaDladla noluthi Chillas njalo ngoMgqibelo, oluke lwenziwa uKhetha “KSG” Gwala. Kuthe sekushintshwa izinhlelo nabasakazi ngoMbasa (March) lwanikwa uSthandwa Nzuza.

Uke wadidiyela nohlelo lwasemini phakathi nezinsuku kulo msakazo wesiZulu.

UThozama uphinde abe umlingisi njengoba eke wabonakala emidlalweni efana ne-Generations: The Legacy eyintombi kaMrekza, Reyka nothi Umjolo: The Gone Girl.

Une-degree ye-Public Relations ne-diploma ye-Sports Management ayenze e-Durban University of Technology (DUT) futhi wenze izifundo zokulingisa eDuma Ndlovu Acting Academy.

KuGagasi FM ukhonjwa ohlelweni lwasekuseni olwenziwa u-Felix Hlophe noMinnie Dlamini oluthi The Uprising.