INGWIJIKHWEBU I-PSL ICHAYISA UMNGANI KAZUMA OBESETHENGE I-ROYAL AM

ABADLALI be-Royal AM kuthe ngoLwesine baziswa ukuthi iqembu selithengisiwe ngakho sebengaqala ukuzilungiselela imidlalo elandelayo. Nokho emuva kwamahora ambalwa kuvele lezi zindaba kubuye kwaba nesimemezelo sokuthi konke lokhu akusekho.

Leli qembu laseThekwini ebeliphethwe usomabhizinisi wesifazane waKwaZulu-Natali, u-Shawn Mpisane ligcine lithengwe omunye usomabhizinisi waseThekwini, u-Roy Moodley ongumnikazi wenkampani yonogada, i-Royal Security.

Kuthiwa uyena ophumelele ekuthengeni i-Royal AM njengoba ibisendalini emuva kwezinkinga ebezibhekene nomnikazi wayo, ezihlanganisa ukubalekela i-South African Revenue Service (SARS).

U-Moodley ongumngani womholi we-MK Party, uJacob Zuma uphinde abe umsunguli weqembu lezepolitiki i-African Movement Congress, elingelinye lamaqembu asanda kuvela ohlwini lwe-IEC njengazokhishwa ohlwini lwayo.

I-Royal AM idayiswa nje ibisibhekene nezinselelo eziningi eziphoqe i-league ephezulu yebhola yakuleli, i-PSL ukuthi ihlehlise imidlalo yayo engaphezu kweyishumi (10) kule-season ka-2024/25.

Kule midlalo kuhlanganisa neye-Nedbank Cup, okugcine kuphoqa ukuthi iginqelwe njengoba lo mncintiswano bekumele udlulele ezigabeni ezilandelayo.

Bekulindeleke ukuthi liqhubeke nokuhlala KwaZulu-Natali leliqembu elibuye laziwe ngokuthi iThwihli Thwahla emuva kokuthengwa usomabhizinisi waseThekwini ehlula owaseMpumalanga, Free State, Gauteng, DR Congo nabanye.

Nokho bekungacaci noma u-Moodley uzoqhubeka yini nokusebenzisa uMgungundlovu njengakhaya leqembu noma iTheku.

Abasondelene ne-Royal AM bathi u-Moddley ubesethembise ukunika abadlali amabhonasi njengohlelo lwakhe lokubagqugquzela ukuthi besuke ezembeni kwazise iqembu kumanje lisendaweni yeshumi nesithupha (16) ngamaphuzu ayisishiyagalombili (8), emidlalweni eyishumi nanye (11).

I-Royal AM igcine ukudlala umdlalo obusekuhambeni ne-TS Galaxy ngomhlaka-29 Zibandlela 2024 lapho yadliwa ngamagoli amathathu eqandeni (3-1). Ngokwemininingwane eku-website ye-PSL, umdlalo waleli qembu olandelayo lizowudlala neMagesi FC ngomhlaka-5 Mbasa 2025

Kuzokhumbuleka ukuthi ngesikhathi kuhleli i-State Capture Commission kwavela ukuthi ngo-2010 inkampani ka-Moodley, i-Royal Security yathola ama-tender afinyelela ku-R471 milion kwi-Passenger Rail Agency of South Africa (PRASA).

Ngo-2023 losomabhizinisi wathola i-tender ka-R282 million emnyangweni wengqalasizinda kuhulumeni wase-Western Cape.

Sibhale lapha sekuvele imibiko ebithi isigungu esiphezulu se-PSL asikuvumanga ukuthengwa kwe-Royal AM njengoba kuyiyona i-PSL ebizoshayela isipikili sokugcina ngesinqumo sokudayiswa nokuthengwa kwaleli qembu. Kuthiwa u-Moodley akanalo igama elihle kwa-SARS nokungase kudale ukuthi leli qembu ligcine seliwele ezandleni zabanye abantu kuhlanganisa no-David Skosana ongumholi we-MK Party, ongomunye wabebebekise ukuthenga leli qembu ngemali engu-R15 million.

U-Moodley ubebhejele ukuthenga i-Royal AM ngemali engu-R20 million agcine engayikhiphanga.