KUSUKA kwesokunxele; Usomabhizinisi waseZimbabwe uMnuz. Rutenhuro Moyo, uMnuz. Robert Gumede ISilo uMisuzulu KaZwelithini, uMfu. Thulasizwe Buthelezi neNkosi Malusi Zondi

ITongaat-Hullets isizokhiqiza ugesi

February 25, 2026 UMKHAYA

KUBUKEKA ithele izithelo ezinhle iminyakazo yendlunkulu kaZulu yokuhlenga inkampani enkulu ekhiqiza ushukela kuleli, iTongaat-Hullets njengoba ngoLwesithathu kumenyezelwe izinguquko ezimqoka ngokuzokwenzeka kuyo.

Kusukela ngesonto eledlule amaziko ehlukene ezindaba abhale imibiko eshaqe abaningi ebithi lenkampani ilengela eweni lokuwa njengoba intula izimali zokuqhubeka nomsebenzi ewenzayo wokugaya umoba.

Lemibiko iqubule ukukhathazeka kubantu kwazise iningi labalimi abakhulu nabasebancane ikakhulu ezindaweni zasemakhaya bathembele kuyo, njengoba amasimu abo kamoba ephakela yona. Ngaphezu kwalokho iqashe inqwaba yabantu abasebenza ngokugcwele nabangamatoho.

Esithombeni: Enye yama-plant eTongaat-Hullets

NgoLwesithathu, mhlaka-25 Nhlolanja 2026 ISilo uMisuzulu KaZwelithini sihlangene nesiqumama, uMnuz. Robert Gumede we-Vision Group ukubhunga kabanzi ukuthi ingahlengwa kanjani lenkampani.

Kule nguyazana bekukhona nondunankulu kaZulu, uMfu. Thulasizwe Buthelezi neso leSilo, Inkosi Malusi Zondi.

UMnuz. Gumede uzibophezele ekutheni uzoyihlenga lenkampani ngokuyishintshela ekutheni kushukela ewenzayo yengenze ngokukhiqiza ugesi ne-ethanol.