Bahlulwe ukuzibamba bahleka u-Mac G ecela imali kwiNdlulamithi

BAVELE baphela insini abantwana baseNdlunkulu ngesikhathi u-MacGyver “Mac G” Mokwevho ongumsakazi we-podcast, i-Podcast and Chill ayethula noSolomzi Phenduka ecela imali eSilweni samaZulu, uMisuzulu KaZwelithini.

Laba bebehamba nowayengumsakazi woKhozi FM, uNgizwe Mchunu osengomunye wabethuli bezinhlelo ezinhlelweni zabo ezibizwa nge-Podcast Network. Uhlelo lukaNgizwe oluzongena njalo ngoLwesithathu ngo-15:00 nangeSonto ngo-20:00 luzobizwa ngeBinca Nation.

Esithombeni: Isikhangiso sohlelo lukaNgizwe Mchuni oluthi Binca Nation oluzongena kwi-Podcast Network

Kwi-video esabalele ezinkundleni zokuxhumana u-Mac G no Sol Phenduka babonakala bebhince ngemvunulo enhle yesintu.

Kule-video u-Mac G uzwakala ecela imali kwiNdlulamithi yamaKhosi ukuze bekwazi ukuqasha umrepha wase-United States (US), u-Young Thug ukuzonandisa kuleli.

Khona obahlebelile ukuthi Isilo siyazifela ngo-Young Thug.

“Besicela imali ngoba sizwile ukuthi ungumlandeli omkhulu ka-Young Thug, sifuna ukumqasha”, kusho u-Mac G qede kwaqhuma insini endlini.

Emuva kwalokho uSol Phenduka ubuze ISilo ukuthi sisayilalela yini i-Hiphop. Siphendulile sathi siyayithanda kakhulu, kodwa asigxilile kwimikhuba yayo njengogqoka ibhulukwe ulitebhise.

“Angeke ngitebhise ibhulukwe. Kungabuzwa ukuthi ISilo senzani manje?”, yaphinde kwaqhuma olunye uhleko.

“Kodwa ngiyayeseka” kusho sona siphendula uSol Phenduka.

ISilo samaZulu sihlale kakhulu e-US, saze sathola i-degree ye-International Relations e-Jacksonville University ese-Florida.

Siwumuntu ophila impilo yesimanje okwenze intsha ithi mayisibiza ezinkundleni zokuxhumana isincokolise ngokuthi “Bayede Dawg”.