Izinkabi ebezihamba nge-NP 200 zidubule kwafa ufakazi owaninda u-Julius Mkhwanazi kuMadlanga Commission
IMADLANGA Commission isikhiphe isitatimende ebidlulisa kuso amazwi enduduzo emndenini kafakazi obebizwa ngo “Witness D” emuva kokudutshulwa afe ngoLwesihlanu.
U-Marius van der Merwe owaveza ubufakazi obushaqisayo ngo-Deputy Police Chief wase-Ekurhuleni Metro Police Department (EMPD), u-Brigadier Julius Mkhwanazi bamdubule amahlandla amabili (2) nge-AK47 wafa ngoLwesihlanu ebusuku ngaphandle komuzi wakhe e-Brakpan eGoli.
Esithombeni: Isitatimende seMadlanga Commission
Lofakazi ubulawe ngesihluku phambi kukankosikazi wakhe abasolwa abebehamba ngemoto eyi-Nissan NP200 emhlophe.
U-Marius ubesebenzela i-EMPD kodwa udutshulwe esengumnikazi wenkampani yonogada i-QRF Task Team ebilwa nokuvimba abamba izimayini ngokungemthetho ababizwa ngamaZama Zama.
Uyena owaveza ukuthi u-Brigadier Mkhwanazi wamyaleka ukuthi akalahle isidumbu somsolwa owashona emuva kokuthi bemufake ishubhu ekhanda.
Kwenzeka konke lokhu nje u-Brigadier Mkhwanazi ubevele kule khomishani kaMadlanga ngoLwesibili nangoLwesithathu lapho ubephoswa khona ngemibuzo ngezigameko ezimataniswa nobugebengu ezenzeka esaphethe eseyisikhulu emaphoyiseni e-EMPD.
Esithombeni: U-Marius van der Merwe
U-Brigadier Mkhwanazi usolwa ngokufakela usomabhizinisi oboshiwe amalambu akuhlaza ezimotweni zakhe.
IMadlanga Commission izoqhubeka nomsebenzi wayo ngonyaka ozayo njengoba ivale ngobufakazi kukangqongqoshe wamaphoyisa kuzwelonke osamisiwe, uSenzo Mchunu.
