Umphathi wele-PSL uthi uDkt. Khoza wahlenga i-PSL kunzima, uchitha izinsolo zikaThidiela

USIHLALO welinye lamaqembu adlala kuMotsepe Foundation Championship, i-Upington City, u-David Magashoa usezichithile izinsolo ezenziwe umphathi we-Black Leopards, u-David Thidiela zokuthi usihlalo we-PSL, uDkt. Irvin Khoza ungundlovukayiphikiswa.

UMagashoa obekade ephethe iSwallows F.C. ngokubambisana nondunankulu waseGauteng, uPanyaza Lesufi muva nje uphawulile ngalolu daba emuva kokuba uThidiela eshiye angalazi egxeka uKhoza ngenkathi ekhuluma emsakazweni i-Radio 2000. UThidiela ubedinwe ukuthi ekuqaleni kwe-season iqembu lakhe belivalwe yi-FIFA ukusayina abadlali kulandela ukuthi kunezimali abengakazikhokhi emuva kokuthenga i-status seqembu i-ALL Stars FC.

Kuzokhumbuleka ukuthi i-Black Leopards idliwe yizembe kuMotsepe Foundation Championship obekusho ukuthi izokwehlela esigabeni esingezansi yabe isithenga i-status se-All Stars FC.

UMagashoa oyilunga labaphathi abangu-32 bamaqembu e-PSL uhluleke ukuzibamba wabeka umbono wakhe ngenkulumo kaThidiela. UMagashoa uthi uKhoza uyindoda eyenza umsebenzi omuhle futhi oncomekayo neyenze ukuthi i-PSL ibe kuleli zinga ekulo njengamanje.

“Iqiniso lithi uKhoza wenza umsebenzi oncomekayo. Ngikhumbula ngenkathi kuhamba i-Glad Africa njengabaxhasi be-NFD, sasingazi sizokwenza njani. UDkt. Khoza wathatha ucingo wafonela u-Pactice Matsepe ngqo wamcela ukuthi angenelele axhase i-league, yonke into yaqedwa ocingweni.

“Angazi ngisho oyedwa kwi-Board of Governors onamandla anjeya owayengenza leyonto. Ngaleso sikhathi uDkt. Khoza wahlenga inqwaba yabantu ababezolahlekelwa yimisebenzi, kuningi nje”, kusho uMagashoa.