Kusolwa ukuthi uzibulele uNathi Mthethwa emuva kokunyamalala ngoMsombuluko ese-France

AMAPHOYISA ase-France asedalule ukuthi kungenzeka ukuthi uzibulele uMnuz Nathi Mthethwa, obeyinxusa lakuleli kuleliyazwe emuva kokutholakala eseshonile ehhotela i-Hyatt Porte Maillot elise-Paris ngoLwesibili.

UMthethwa obengungqongoshe wamaphoyisa ngaphansi kukamengameli uMnuz. Jacob Zuma ugcine ukubonakala ngoMsombuluko esedolobheni i-Paris.

Uphiko lwamaphoyisa akuleliyazwe olubizwa nge-Brigade for the Repression of Crime against Persons (BRDP) lubike kwabezindaba ukuthi agcine ukulandela inombolo yocingo lwakhe ngoMsombuluko ngabo-15:00 ntambama iseduze kwe-Bois de Boulogne esedolobheni i-Paris.

Lamaphoyisa athe kungenzeka ukuthi uzibulele uMthethwa ogcine etholakale ehhotela elise-Paris esethule.

Ngokubika kweziko lezindaba lase-France, i-Daily Mirror uMthethwa ugxume esuka ku-22nd floor wayosakazeka phansi nokuyilapho atholakale khona.

Ngaphambi kokuba atholakale amaphoyisa athi umkakhe uwabikele ukuthi uMthethwa umthumelele umyalezo othusayo, emuva kwalokho kube sekukhishwa amathimba ehlukene abembheka kuhlanganisa nezinja ezihogela umkhondo.

Abezindaba bakhona e-France bazamile ukufonela ihhovisi lenxusa lakuleli elisedolobheni i-Paris ngoLwesibili ekuseni kodwa akekho obebamba ucingo.

Amaphoyisa asaphenya ukuthi yini eholele ekufeni kukaMthethwa.