UKanye West uzonandisa ekhonsathini yomhlaba ezoba seGoli ngo-December

KUBE izindaba ezimnandi kubalandeli baka-Kanye West bemuzwa ememezela ukuthi uzonandisa e-Ellis Park eGoli ngomhlaka-13 Zibandlela (December) 2025.

U-West osezibiza ngo-YE ubhale ekhasini lakhe le-X azisa abalandeli bakhe ngalezindaba.

“YE bukhona eNingizimu Afrika

Johannesburg, 13 Zibandlela 2025

Ngizonandisa eNingizimu Afrika kuphela

Bhalisela ithikithi: Ticketspro.co.za”, ubhale kanje ku-X.

Akuphelanga sikhathi esingakanani bese kuphendule abalandeli abangaphezu kuka-20 000 kuhlanganisa nama-views, abanye befuna ukwazi ukuthi amathikithi atholakala kanjani.

Atholakala kanjani amathikithi alekhonsathi? Umbuzo abantu abazibuza wona lowo.

Embhalweni awufake ku-X u-YE uthe amathikithi atholakala ngokubhalisa ku: Ticketpro.co.za. Eminye imininingwane izokhishwa iMonyane Group okuyiyo ehlela ikhonsathi nabaphathi benkundla i-Ellis Park Stadium.

Iwona mcimbi osuhlonzwe njengozoba mkhulu ekhalendeni lemicimbi eNingizimu Afrika, futhi ozokwenza imali enkulu njengoba kuyiwona wodwa u-YE azonandisa kuyo e-Afrika. Abazi izinto emkhakheni womculo sebeqalile ukuqagula ukuthi ungase uphule irekhodi lokudayiswa kwamathikithi amaningi kuleli.

Abalandeli bakhombise ukuba magange ukuhambela lekhonsathi.

“Anginendaba ukuthi kuzoba imalini, ngizoba khona!”, kusho omunye umlandeli ku-X.

Kulindeleke ukuthi abakwa-Ticketspro bamemezele ukuthi amathikithi aziba imalini futhi azohlukana kanjani.