Uvuke ngesokuba umphathi ku-Rise FM uKhoza

ISITESHI somsakazo saseMpumalanga i-Rise FM sesimemezele inkakha yomsakazi, uMakhosi Khoza njengomphathi omusha.

UKhoza unamava angangabazeki emsakazweni njengoba eseke wasakaza emisakazweni eminingi okubalwa kuyo i-Durban Youth Radio, East Coast Radio, Vuma FM, Radio 2000, 702 neGagasi FM.

Sekuke kwaba nezinkulumo ezimkhomba esiteshini saseThekwini esingaphansi kwe-SABC, Ukhozi FM njengoba belufuna umuntu ozovala isikhala somphathi wezinhlelo esavuleka kuhamba uZandile Tembe.

UKhoza ongumbhali wencwadi ethi Ngizolalela Emsakazweni uke waba umphathi wezinhlelo kuGagasi FM ngo-2019 nokuwumsebenzi angahlalanga kuwo kakhulu.

Ngesikhathi eshiya kwaba nezinsolo zokuthi ucasulwe ezinye izikhulu zalo msakazo ezigxambukela emsebenzini wakhe yize yena wathi uzishiyele ngokuthanda.