Umasipala waseMandeni uxhase abamabhizinisi asemancane ngezinsiza zokusebenza
UMASIPALA waseMandeni udlulisele uxhaso lwama-QuickWins kosomabhizinisi abangamashumi ayisikhombisa nambili (72) bokuqala kwabayikhulu namashumi amahlanu (150) abahlomulile kuloluhlelo.
Lena ingxenye yokuqala kulabo ababefake izicelo ngoNcwaba (August) wonyaka odlule.
Imeya womkhandlu waseMandeni, ikhansela Thabani Mdlalose unxuse labo abahlomulile kuloluhlelo ukuthi baqhubeke nokuzimisela emkhakheni wezebhizinisi ukulekelela ukukhanda amathuba emisebenzi.
“Ngaphezulu kokuhlinzeka ngezinsiza, sinazo izinhlelo zokuthekela ulwazi eningaqhubeka nifake izicelo zokuba ingxenye yazo. Lokhu sikwenzela ukuthi uma sesikulekelele ukusimamisa ibhizinisi lakho, ubenalo ulwazi lokuqinisekisa ukuthi liyadlondlobala likwazi nokudala amathuba emisebenzi”
“Sinalo nohlelo lokunxenxa izinkampani nosomabhizinisi abahlukene ukuthi basebenzisane nosomabhizinisi abancane ukuze bezokwazi ukuba nesipiliyoni kanye ne makethe yomsebenzi yabo” kubeka uMdlalose.
Esithombeni: Imishini yokugunda utshani ehlonyulwe osomabhizinisi abancane kumasipala waseMandeni
Esithombeni: Ukudla kwezinkukhu okuhlonyulwe osomabhizinisi abancane kumasipala waseMandeni
Phakathi kwezinsiza ezidluliselwe ko somabhizinisi, singabal imishini yokugunda utshani, eyokusika izihlahla, imishini yokuthunga, imishini yoku-printer, ama-generator, izitofu, amabhodwe, amatende, water pumps, nokunye okuningi.
Umnyango wezokuxhaswa kwamabhizinisi amancane ngaphansi kukamasipala waseMandeni, uyaqhubeka nokuhlonza abazohlomula esigabeni sesibili saloluhlelo.
Ukubheka ibanga eselihanjiwe isicelo sakho, ungaxhumana nehhovisi lakwa-Local Economic Development kulenombolo ethi 0324568272.
