UTSHATHA USEZOGIJIMA NO ‘NOZISHADA KAMAQHOBOZA’ KU-WNB OKHOZINI

SEKUPUTSHUKE izindaba ezithi umunwe usukhombe uSthandwa Nzuza ekuvaleni isikhala sika-Selbyonce ‘Selby’ Mkhize oshiye isiteshi esingaphansi kwe-SABC, uKhozi FM kungazelele ngemuva kweminyaka eyi-13 esakaza kulo wajoyina umsakazo owenza inzuzo ozinze e-Cornubia, eThekwini, iGagasi FM. U-Selbeyonce ugcine e-SABC ngoLwesithathu ohlelweni abelwenza noKhathide ‘Tshathugodo’ Ngobe oluthi Woza Nabangani Bakho, wezwakala esesakaza olwenziwa u-DJ SPHEctacular no DJ Naives kuGagasi FM oluthi Fastlane.

I-Fast Lane ingena njalo ngoMsombuluko kuya kuLwesihlanu kusukela ngehora lesithathu (15:00) kuya kwelesithupha (18:00) ntambama.

U-Selbeyonce wafika ngomfutho kuKhozi FM esakaza uhlelo oluthi Umnyakazo Top 20 okwamenza wakhushulelwa kolwasemini olwaluthi Ndiza Nathi 12 to 3 wagcina kolwantambama olunabalandeli abaningi, iWoza Nabangani Bakho.

USthandwa ovame ukuzibiza ngoNozishada kaMaqhoboza ukhonjwa ohlelweni lwantambama kuKhozi FM nje, usanda kukhuza ibuya njengoba wagencwa izembe eminyakeni edlule wase egxila ekulingiseni. Le ntokazi yaseNanda njengamanje isakaza uhlelo iChillas njalo ngoMgqibelo ebusuku. Ekulingiseni usekhona njengoba ebonakala kumdlalo waku-SABC 1, Amalanga Awafani ongena ngokugamanxa kwwehora lesithupha (18:30) kushilwa.

Yize i-SABC ingatholakalanga ukuphawula, kodwa kulindeleke kumenyezelwe lezinguquko ezimfishane e-SABC maduze.