UMATTHEW LANI USEFUNA R2.5 M EMNYANGWENI WEMFUNDO EGAUTENG NGOKUMTHUNAZA

UNDABUZEKWAYO kadokotela ‘ongumbombayi’, u-Matthew Bongani Lani useyise umnyango wemfundo eGauteng ngenhloso yokuthi umkhokhele imali engu-R2.5 million ngokumehlisa isithunzi.

Ufuna ukukhokhelwa ilo mnyango ngokuthi wakhipha isitatimende kwabezindaba umbiza ngodokotela ongumbombayi obehambe ezenza isifundiswa ebe engenamatikuletsheni.

Emaphepheni afakwe enkantolo, i-Johannesburg High Court, abameli bakaLani bathe isitatimende salo mnyango singamanga. Uthe simehlisa isithunzi futhi sinobudedengu, sithunaza ukuhlonipheka nokubaluleka kwakhe emphakathini.

“Lesitatimende esithunazayo esashicilelwa esibamangalele sabukwa cishe izikhathi ezifika ku-1.4 million enkundleni yokuxhumana u-X (obuwaziwa ngo-Twitter). Sabuye sabhalwa amaziko ezindaba amakhulu kulrli naphasheya, okwakwandisa wona lamanga.

“Lokhu kusabalaliswa kwalamanga ngekhasimende lethu, kwaholela ekuthini libe inhlekisa, lihlukunyezwe futhi lilahlekelwe amathuba.

“Indlela okwashesha ngayo ukusabalala kwalesitatimende kwakumfaka ingcindezi enkulu, kuthunaza isithunzi futhi kumlimaza nomqondo”, kubhalwe emaphepheni asenkantolo

Uthe isitatimende somnyango wemfundo eGauteng esithi awunayo imininingwane ethi uLani unomatikuletsheni futhi uhambe ezenza udokotela ezinkundleni zokuxhumana asilona iqiniso.

Uthe ngesikhathi kushicilelwa lesitatimendeni wayengaboshiwe, futhi awekho amacala ayebekwe wona noma awaqula enkantolo.

ULani ufake emakhasini akhe ezinkundleni zokuxhumana ukuthi uneziqu zobudokotela ze-MBBS azithola e-Wits University afunde kuyo ngo-2014 kuya ku-2021. Nokho lesi sikhungo siyachitha lokho njengoba siveze ukuthi asinayo imininingwane efakazela akushoyo.