BAZOGUBHA USUKU LWENTSHA NGEMIDLALO EMACAMBINI
INHLANGANO yomphakathi eyasungulwa uSya Thusini, iSakhamacambi Community Projects ihlela indumezulu yemidlalo yebhola ebizwa ngeMkhaya Cup eyingxenye yemibhiyozo yokubungaza inyanga yabantu abasha. Lemidlalo izoba mhlaka-15 no 16 Nhlangulana 2025, KwaMatondo Sportsground ngasesikoleni eMthaleni Primary School eMacambini.
UThusini ophinde abe ngumgqugquzeli walemidlalo uthe inhloso enkulu yayo ukukhuthaza intsha esafisa ukukhula ebholeni njengoba kuzobe kukhona abadlali abagijima kuma-league amakhulu kuleli okuyi-PSL neMotsepe Foundation iningi labo abavela khona eMacambini njengoSphelele Magubane oku-Black Leopards nabanye.
UThusini utshele UMKHAYA ukuthi lemidlalo uyiqambe ngegama elithi Mkhaya Cup elisusela egameni likamfowabo uNqubeko ‘Mkhaya’ Thusini ogijima kuMuzi King Masters ephethwe uMuzi Ntuli naye odabuka eMacambini.
Uphethe ngokucela ukubambisana okuhle kubo bonke abazobe bebambe iqhaza kulemidlalo athe akangabazi ukuthi izophinde idlale indima enkulu ekunciphiseni ubugebengu endaweni njengoba izogcina intsha imatasa.
Esithombeni: Kuvela ukuqhathwa kwamaqembu esigabeni sokuqala
IMIDLALO YESIGABA SOKUQALA:
10:00 – Wangu Citizens 🆚 Amatikulu Academy
11:05 – Shosholoza FC 🆚 Mambas FC
12:05 – Real Magic 🆚 Thabekhulu FC
13:30 – Young Masters 🆚 Paris FC
14:50 – Mhlubulweni Mighty Rovers 🆚 Manchester
15:55 – Thengela Academy 🆚 Old Timers
