UNTULI UNGENELELE MASISHA UKULUNGISA IZINKINGA ZOMNYANGO WEMFUNDO E-KZN
UKUQONDA kabanzi ngokwenzeka ezikoleni nokubeka phambili imfundo kwenze undunankulu wesifundazwe saKwaZulu-Natali wayeka zonke izinhlelo abenazo, wabiza umhlangano ophuthumayo nomphathiswa wemfundo eyisisekelo ocishe wawuguqisa lo mnyango, uMnuz. Sipho Hlomuka, owemali uMnuz. Francois Rogders nezinyunyana zothisha. Kulo mhlangano obungoLwesithathu undunankulu uthathe izinqumo ezinqala ngenhloso yokulungisa isimo ebesizoguqisa izikole zakulesi sifundazwe.
Esithombeni: Umphathiswa womnyango wemfundo e-KZN, uMnuz. Sipho Hlomuka
Kuzokhumbuleka ukuthi ngoMsombuluko izikole eziningi azikwazanga ukuqala ukubhala izivivinyo zamaphakathi nonyaka njengoba umnyango ungakwazanga ukuzihlinzeka ngamaphepha okubhala. Izikole bezizoyenza zona imizamo yokukhiqiza amanye amaphepha ukuze kubhalwe.
Kwenzeka konke lokhu nje lo mnyango awuzinikile izikole imali ebizwa ngama-norms and standards ezisiza ukubhekana nezindleko ezincane ezenzeka nsukuzonke.
IZINQUMO EZITHATHIWE:
●Kuzonconzulwa imali engu-R900 million kweminye iminyango ukuze kulungiswe lesi simo.
●Kuzokhokhwa imali ephelele ezikoleni ebishoda kusukela ngo-2024 kuya ku-2025 emasontweni amabili.
●Ukuzibophezela ukuthi izivivinyo zikaNhlangulana aziphazamiseki.
●Ukuqashwa kwabasebenzi abagxile ehhovisi nokusungula ezinye izikhala zemisebenzi.
●Kuzobizwa umhlangano olandelayo ukulandelela ukuthi konke okuvunyelenwe ngakho kuyenzeka yini.
Undunankulu uthe uhulumeni wakhe uyibeke phambili indaba yemfundo. “Ukufunda nokufundisa kuseqhulwini kulo hulumeni. Egameni likahulumeni waKwaZulu-Natali ngidlulisa ukuxolisa okukhulu kubafundi, othisha nabazali ngokuphazamiseka okwenzekile. Sizinikele ukubuyisela uzinzo nokuqinisekisa ukuthi wonke umntwana uthola imfundo emfanele”, kusho uMnuz. Ntuli.
