LIGWETSHWE (10) WEMINYAKA IPHOYISA ELAHLELA UKUBULALA UKHOMISHANE WAMAPHOYISA EMZINYATHI

INKANTOLO i-Newcastle Magistrates’ Court igwebe iminyaka elishumi litholoza ejele iphoyisa ebelingukaputeni, u-Cpt. Roshanlal Banawo (63) ngecala lokuhlela itulo lokubulala obengukhomishane wamaphoyisa esifundeni saseMzinyathi, u-Major-General Francis Slambert.

UBanawo uxoshwe embuthweni wamaphoyisa ngo-2021 emuva kophenyo lokushushumbiswa kwezidakamizwa obelwenziwa ngaphakathi olwaholelwa ekutholweni kwezidakamizwa endaweni abehlala kuyo.

Phakathi kukaNhlaba noNcwaba 2023 uBanawo wacela umuntu thizeni ukuba amsize amtholele ushayas’bhamu ozobulala u-Slambert oke waba umphathisiteshi e-Mountain Rise eMgungundlovu. Umuntu lowo wamthola ushayasbhamu owayezosuka e-Dundee ezobulala u-Slambert.

Esithombeni: U-Major-General Francis Slambert

Emuva kwamahlandla amabili u-Slambert ephunyuka edutshulwa, uphiko lwesifundazwe oluyisipesheli luthole ngolwazi ngetulo lokumbulala lwabe seluqalisa uphenyo olwaluholela kushayas’bhamu nomuntu lo owayengungqondongqondo ekuhleleni itulo lokumbulala.

Ophenyweni lwawo amaphoyisa ophiko oluyisipesheli athola izingxoxo phakathi kukaBanawo nomuntu ayemcele ukuthi amtholele ushayas’bhamu, wabe eseboshwa uBanawo ngoLwezi 2023.

Ngesikhathi kuqulwa leli cala ngoLwesithathu, mhlaka-14 Nhlaba 2025 ummeli wombuso, u-Adv. Adriaan (Attie) Truter uhlinzeke inkantolo ngobufakazi obuqanda ikhanda betulo lokubulala U-Slambert emuva kokuba ushayas’bhamu nomuntu owayecelwe uBanawo ukuthi emhlelele leli tulo bebengofakazi benkantolo.

Ulwazi olutholakale komakhalekhukhwini kanye nezivimbelo zenkantolo ebeziyalela laba ukuba bengasondelani nazo zibe ingxenye yobufakazi obebuphethwe umbuso enkantolo.

Ukhomishane wamaphoyisa esifundazeni saKwaZulu Natali, u-Lt. Gen. Nhlanhla Mkhwanazi ubekhona naye kule nkantolo.