U-REBECCA MALOPE UFUNA R1M KWABASEBENZISA ISITHOMBE SAKHE NGOKUNGEMVUME

UMCULI wakuleli osenqobe inqwaba yezindondo, u-Rebecca Malope usefake enkantolo inkampani i-Procter & Gambles SA (P&G) ngokungamkhokheli imali yize isebenzisa isithombe sakhe emkhiqizweni wayo wensipho i-Ariel. I-P&G ikhiqiza iphinde isabalalise imikhiqizo eminingi eyaziwayo kuhlanganisa nensipho eyimpuphu i-Ariel uMalope abeyinxusa layo kusukela ngo-2016.

Ngokwamaphepha asenkantolo isivumelwano sikaMalope ne-P&G sasizoqala ngomhlaka-1 Ntulikazi 2016 siphele ngmhlaka-30 Nhlangulana 2017. Lesi sivumelwano besilokhu sivuselelwa kwaze kwaba uMandulo 2022, kanti emuva kwalokho asibange sisavuselelwa.

Yize isivumelwano singavuselelwangwa kodwa i-P&G ibilokhu iqhubeka nokwenza imikhiqizo enesithombe sikaMalope kwaze kwaba ilo nyaka.

Ngokwamaphepha asenkantolo imali ebitholwa indlovukazi yomculo wokholo ngokwesivumelwano asenza ne-P&G ingu-R350 000 ngakho njengoba ibilokhu iqhubeka isebenzisa isithombe sakhe nakuba kungekho okuvuselelwe imkweleta imali engu-R1 million. Lesi kweletu eseminyaka u-2023. 2024 no 2025.

Abameli bakaMalope batshele inkantolo ukuthi ikhasimende labo lizamile izikhathi eziningi ukuxhumana nabe-P&G ukuze kulungiswe lolu daba kodwa le nkampani ibingazimisele ukusebenzisana nalo. Kuthe ngokuhamba kwesikhathi abameli bayo benza umqingo obuhlahla indlela yokukhokhelana emuva kokuba uMalope esefake udaba enkantolo kodwa yona qobo inkampani yangawusayina.

UMalope ube esephoqeleka ukuqhubeka nodaba esebenzisa umthetho futhi ngenxa yokubiza kwezindleko zokuqhuba lolu daba enkantolo utshele i-P&G ukuthi imkhokhele izindleko.

Ethintwa uMalope uthe kumzwisa ubuhlungu ukuthi lolu daba seluze lwafika kuleli qophelo. “Ngizizwa ngidelelwa yilabantu, ikakhulukazi ngoba besingalwi nabo. Sibacele kahle ngokuthula futhi ngenhlonipho, sathi: ‘Asilungiseni lento’. Besinobudlelwano obuhle ne-Ariel futhi besisathanda ukuqhubeka”, kusho yena.

Uthe ngesikhathi esasebenzisana nale nkampani ubezinikele ngakho konke futhi eyimele ngokuziqhenya. Ukuphathwa ngalendlela akusikho ukuthi akunabulungiswa kuphela kodwa kunokungahloniphi yonke into ayiyo. Uqhubeke wathi: Esikufunayo kuphela ukubeka udaba oluthi bengingakhokhelwa yize isithombe sami besilokhu sivela kuleminyaka edlule. Esikhundleni sokuthi besebenzisane nathi ukulungisa lento, bona bayazihlangula. Ilokho okuphoxayo futhi okuzwisa ubuhlungu.

“Sengisebenzekulomkhakha iminyaka engamashumi amathathu nesithupha (36). Abantu bayazi ukuthi ngiziphatha ngobuqotho. Umsebenzi wami ngiwubeka phambili futhi ngiyayithanda engiyenzayo”, kusho uMalope.

Uthe lesi simo simbangela ukhwantalala, ikakhulu ngoba yena ne-P&G bebenobudlelwane obuhle kusukela ngo-2016. Uthe bahambele kakhulu amazwe nezindawo ezingaphakathi ezweni besabalalisa lomkhiqizo.

Lo mculo owaduma ngengema ethi Ngegazi Lemvana uthe izinto ziqale ukushintsha phakathi kwakhe ne-P&G sekufika ithimba elisha. Ubudlelwano baqala babamuncu yize kutshalwe kakhulu kulo mkhiqizo kuleminyaka edlule.

“Izinto bezihamba kahle kwaze kwavuselelwa inkontileka ngo-2021, esiqhube kwaze kwaba u-2022 silokhu sijabulile ngobekwenzeka. Kodwa selokhu kufike ithimba elisha izinto zivele zashintsha”, kusho yena.

Uthe ngendlela elenza ngayo ithimba elisha ngathi alazi ukuthi yini ebiyenzeka kuleminyaka edlule nethimba elidala. “Esikhundleni sokuthi beqhubeke nokuqikelela ukuthi ubudlelwano buba buhle, bona babubukela phansi”, kusho yena.

Uthe ngaphambi kokuthi afake abameli kule ndaba uke wazama ukuxhumana nabe-P&G kodwa akusebenzanga. Uthe ubefuna ukulungisa lento ngokwesivumelwano abenaso nale nkampani kodwa yona yangayigqiza qakala imizamo yakhe. Utshele iziko lezindaba i-City Press ukuthi: “Emuva kokuthola ukuthi siphethe ubufakazi obubucayi babe sebenza umqingo obuhlahla indlela yokukhokhelana (isamba semali akasidalulanga).

“Angifuni ukungena endabeni yemali abebekhuluma ngayo. Kodwa kuthe ngokuhamba kwesikhathi bashintsha umqondo, banquma ukungaqhubeki nokwakha indlela yokukhokhelana. Ilapho-ke engibone khona ukuthi sekufanele ngifake abameli ukuze bengisize ngifike esiphethweni sale ndaba futhi ngithole imali engifanele.

Lo mculi oke waba ijaji lo mncintiswano i-Clash of the Choirs uthe yena akufunayo ukuthi abe-P&G benze into efanele, nathemba ukuthi inkantolo izosiza ukuthi kufikwe esivumelwaneni esikahle futhi kuqedwe lolu daba ngenhlonipho.

*Umthombo: City Press