USIYA MHLONGO UHLASELA NGOMMELI WABASOLWA NGOKUBULALA U-AKA
Ngu Sphamandla Mthethwa
OBENGUMSAKAZI woKhozi FM, uSiya Mhlongo useqinise ithimba labameli bakhe ngogalagala lommeli, uSimphiwe Mlotshwa omele abasolwa ecaleni lokubulawa komrepha u-Kiernan ‘AKA’ Forbes nomngani wakhe uTebello ‘Tibz’ Motsoane ngaphandle kwendawo yokudla i-Wish ku-Florida road eThekwini.
UMhlongo oneminyaka engamashumi amane nambili (42) ubhekene necala lokushaya enye insizwa abenobudlelwaneni bezothando nayo, uNjabulo Duma emuva kwengxabano phakathi kwabo laba bobabili.
Lesi sigameko okuthiwa uMhlongo wagqema kuso uDuma ngebhodlela lotshwala senzeka ngonyaka odlule ngaphandle kwendawo yokucisha ukoma eThekwini. UDuma ube esevula icala esiteshini samaphoyisa e-Durban Central.
Kuthe ngoLwesithathu, mhlaka-30 Mbasa 2025 enkantolo, i-Durban Magistrate’s Court ummeli wokuqala kaMhlongo, uSkhumbuzo Mathabela wethula uSimphiwe Mlotshwa njengomunye wabameli kuleli cala elingundabamlonyeni.
UMlotshwa unamava kwezomthetho njengoba eke waba umqondisi wophiko lwabaphenyi esifundazweni saKwaZulu-Natali. UMlotshwa uthe efika nje wangachitha sikhathi, wacela ukuba icala lihlehliswe ukuze anikwe ithuba lokuzijwayeza ngemininingwane yalo. Uthe waziswe ngocingo, ngeSonto lomhlaka-27 Mbasa 2025 ukuthi uzoba ingxenye yecala, kwathi ngoLwesibili watshelwa kafushane ngokwenzeka ecaleni. Ngakho usadinga isikhathi esanele sokucubungula eminye imininingwane.
Nokho umshushisi wombuso, u-Shennaz Hoosen usiphikisile lesicelo ngelokuthi uMlotshwa ubenesikhathi esiningi kabi sokuzijwayeza nemininingwane yecala.
Imizamo ka-Hoosen ayiphumelelanga njengoba imantshi, uMhlonipheni Sibiya ilihlehlisile icala kodwa yakuveza ukuthi lokhu bekungenasidingo.
Imantshi ithe ummangalelwa unelungelo lokumelwa umuntu amthandayo.
Leli cala liqale ukuqulwa ngomhlaka-25 Mbasa 2025 lapho ummangali abehleli khona ebhokisini lofakazi ebeka udaba lwakhe, labe selihlehliselwa umhlaka-30 Mbasa 2025 lapho abameli bakammangalelwa bekulindeleke ukuthi bepheke uDuma ngemibuzo.
Isithombe: USiya Mhlongo efika nommeli wakhe uSkhumbuzo Mathabela enkantolo i-Durban Magistrate’s Court
UMhlongo ufike enkantolo ehambela phezulu ehamba nommeli wakhe uMathabela. Ubedlubhe isudi ekuhlaza cwe nezicathulo ezimnyama futhi enokuzethemba okuyisimanga. Uliphikile leli cala.
UMhlongo uxoshiwe umisiwe ohlelweni abelwenza oKhozini oluthi Ubusuku Obuhle emuva kwesigameko sokushaya uDuma. Kuthe noma sekuvuselelwa izinkontileka ezintsha zabasakazi eyakhe yangavuselelwa.
Icala lakhe lihlehlele umhlaka-10 no 11 Ntulikazi 2025, okuzothi mhlaka-28 Nhlaba abameli bakhe baqinisekise inkantolo ukuthi bakulungele ukuthi kuqhutshekwe nokuqulwa kwecala. Baphinde balunywa ngendlebe futhi ukuthi bekhokhe izindleko zokuhamba zikaDuma njengoba esuka eGoli njalo makuqulwa leli cala.
*Ungalelala lolu daba ekhasini loMkhaya lika-Tiktok [@umkhayatv]
