WADAYISELA ISANGOMA INGANE YAKHE NGOBA SIFUNA AMEHLO NESIKHUMBA SAYO

KUSHAQEKE inqwaba yabantu abebesehholo i-White City Multipurpose Centre e-Saldanha Bay lapho kuhleli khona inkantolo, i-Western Cape High Court bezwa ukuthi umama ka-Joslin Smith owanyamalala eneminyaka eyisishiyagalombili (8), u-Racquel Smith wamdayisela isangoma ngoba sifuna amehlo nesikhumba sakhe. Enkantolo ngoMsombuluko kuvele ukuthi u-Joslin wadayiselwa isangoma ngemali engu-R20 000.

Umama ka-Joslin, u-Racquel odume ngelika ‘Kelly’, isoka lakhe u-Jacquen Apollis nomngani wakhe u-Steveno Duwayne Van Rhyn babhekene necala lokuphula umthetho wokuvikelwa ukudayiswa kwabantu, abaliphikayo.

U-Laurentia Lombaard odume ngelika ‘Renz’ ongufakazi oqavile wenkantolo naye oke waba ngumsolwa kuleli cala uthe wabuza u-Kelly kungani abantu beyifuna kangaka ingane yekhe. Uthe wamphendula wathi “bafuna amehlo akhe nesikhumba”.

U-Laurentia uthe u-Kelly wathols imali engu-R20 000 wase emthembisa imali engu-R1000 ukuze angathi vu ngalolu daba lokudayiswa kwengane njengoba wayelwazi naye. Enye imali engu-R1200 kwakufanele inikwe u-Van Rhyn ngoba naye wayelwazi lolu daba.

U-Laurentia utshele inkantolo akayilandelanga kakhulu indaba yale mali okwakumele ayithole futhi u-Kelly akazange amnike. Uthe wabona ngesikhathi u-Kelly ekhombisa isoka lakhe u-Apollis ingxenye yale mali, wamuzwa ethi: “Nansi imali engiyinikwe isangoma”.

Uthe u-Kelly wazivumela yena kuye ukuthi useyidayisele isangoma ingane yakhe. “Renz sengenze into ebhedayo. Sengiyidayisele isangoma ingane yami”, kusho u-Kelly.

Udadewabo ka-Kelly, u-Mickey Daniels oyiphoyisa e-Uppington e-Northen Cape uthe ngesikhathi ekhuluma naye ngokulahleka kwengane waba nesiqiniseko ukuthi ingane izotholakala. “Ingane ikhona lapha emijondolo, kunomuntu ofuna ukuyidayisa kodwa ngibona ukuthi izodayiswa e-Saldanha”, kusho u-Kelly kudadewabo.

U-Mickey uthe ngesikhathi exina udadewabo ngemibuzo wamtshela ukuthi lemibuzo ayibuzayo useyiphendulile emaphoyiseni. “Ngiyazi ukuthi uyiphoyisa kodwa angeke ngilokhu ngiphendula into eyodwa”, kusho u-Kelly.

Osengufakazi wenkantolo, u-Laurentia uthe wambuza futhi umngani wakhe u-Kelly yini le engaka eyayingenza adayise ingane yakhe, uthe wamphendula wathi udinga imali futhi uxakekile.

Uthe kwathi noma embelesela u-Kelly emxina ngalolu daba, wavele wathi: “Sekwenzekile futhi akusekho engisengakwenza ngalento”.