U-TOUCHLINE UTHI AKEKHO UMCULI OFIKA KU SJAVA KULELI

UPHUMELE obala wancoma uJabulani ‘Sjava’ Hadebe umculi we-Hiphop, uThabo ‘Touchline’ Mahlwele odume ngengoma ethi 3 Meter. Lo mculi uncome uSjava kulandela ukukhipha kwakhe ingoma yakhe entsha ethi Inkanyezi.

U-Touchline uthe akekho umculi amaziyo ofika ezingeni likaSjava eNingizimu Afrika. Akuqali ukuthi u-Touchline ezwakale encoma abanye ozakwabo endimeni yomculo. Uveze ukuthi uhlabeke umxhwele nge-EP kaSjava asanda kuyikhipha ethi Inkanyezi.

Uyaziwa uSjava ngokukhipha ungqambothi lwezingoma ezipholile ezikhuluma ngothando nangempilo ngokubanzi. Le-EP yakamuva eyenziwe bukhoma e-stage lapho kuzwakala khona ukushawa kwezinsimbi bukhoma nezihlwele, ishayele isipikili sokugcina.

Abantu abaningi nabalandeli bakhe uSjava sebekhombise ukuwuthakasela lo msebenzi wakhe omusha gakho akuthusi ukuzwa u-Touchline emvuma ngale ndlela lo mculi osebenzisane no-Big Zulu emsebenzini obizwa ngokuthi Izinkabi Zezwe.

U-Touchline ubhale ekhasini lakhe ku-X eveza encoma futhi edalula inhlonipho anayo ngomsebenzi kaSjava

“Akekho umuntu ongangenza ngicabange ukuthi uSjava akasiyena umculi ohamba phambili esengike ngamuzwa empilweni yami. Futhi lokho angikusho nje emoyeni”, kusho yena.