KUVULWE ICALA KUTHOLWA INHLAMVU YESIBHAMU EHHOVISI LIKAMPHATHISWA

UMPHATHISWA womnyango wemisebenzi yomphakathi esifundazweni saKwaZulu-Natali, uMnuz. Martin Meyer usevule icala emaphoyiseni kulandela ukuficwa kwenhlamvu yesibhamu ibekwe ngaphandle komnyango wehhovisi lakhe ngoMsombuluko.

Ngokusho kwesitatimende esikhishwe ilo mnyango inhlamvu ibonwe abasebenzi abebeze emsebenzini ngoMsombuluko ekuseni njengokujwayelekile. Babe sebebikela abaphathi bona abazise umphathiswa, uMnuz. Meyer obengekho ehhovisi ngesikhathi kwenzeka lokhu.

Isithombe: Isitatimende esikhishwe umnyango ngokutholakala kwenhlamvu emnyango wehhovisi likamphathiswa uMnuz. Martin Meyer

Nokho umphathiswa, u-Meyer uthe akukho ukusatshiswa okuzomenza ahlehle ekulweni nobugebengu kulo mnyango.

Kuthiwa sekungokwesibili kwenzeka isigameko esifuze lesi njengoba nangonyaka odlule kwenzeka ngemuva kokuba uMnuz. Meyer edalule ukuthi ngeke babekezelelwe labo abafuna umsebenzi wezinkontileka ngenkani kulo mnyango. Kuzokhumbuleka ukuthi miningi imisebenzi kahulumeni emile yangaqhubeka kule minyaka edlule emuva kokuba kuneqembu labantu elide liphazamisa ukusebenza ukuze lithole ingxenye yemali ngomsebenzi.

“Kuyishwa nje ukuthi lesi gameko sakamuva senzeka ngesikhathi umphathiswa nabasebenzi bomnyango bebuyela emsebenzini emuva kokubamba inkomfa yezinsuku ezimbili, i-‘Build KZN Together’ ebeyimpumelelo. Le nkomfa ibise-Durban ICC lapho umphathiswa, uMnuz. Meyer egcizelele khona ukuthi le nkomfa ayenzelwe ukuba inguyazane yokudlulisa imisebenzi engaziwa.

Muva nje lo mnyango usuvundulule inqwaba yezenzo zobugebengu nenkohlakalo ezithinta ukukhishwa kwemisebenzi nokukhokhwa kwemali ngendlela engekho emthethweni njengoba sekunenqwaba yabasebenzi ababhekene nokuqondiswa ubugwegwe nasebexoshiwe ngalokho.

Isitatimende salo mnyango sikugcizelele ukuthi umphathiswa wawo uzimisele ngokuqhubeka nokwenza lo mnyango usebenzele abantu baKwaZulu-Natali.