BAPHUMELELE BONKE ABEBEBHALA UMATIKULETSHENI EMAJELE

BAPHUMELELE bonke ababoshwa abangaphezu kwamashumi amahlanu (50) abasezikoleni zezikhungo zokuhlunyeleliswa kwezimilo esifundazweni saKwaZulu-Natali ababhale izivivinyo zikamatikuletsheni ka-2024.

Undunankulu waKwaZulu-Natali, UMnuz. Thami Ntuli ubancomile ngokwenza kahle kwabo emcimbini obuse-Durban ICC eThekwini ngoLwesibili.

“Basebenzisa ithuba lokujikisa izimpilo zabo bafulathele impilo yobugebengu, yisikole iKuseni Secondary esinabafundi abahlanu, iQalakabusha Secondary School ngabayisithupha, Usethubeni Youth enabangashumi amabili nanhlanu, iSicebengolwazi Secondary enabafundi abayishumi nesikhombisa”

UNtuli uphinde wancoma impumelelo yezikole ezinezidingo ezikhethekile (special needs schools) ezenze kahle.

“Isikole sabangezwa iVuleka eKing Cetshwayo, AM Molla Spes Nova ePinetown, Open Air eMlazi, Fulton School for the Deaf ePinetown, Kwathintwa School of the Deaf ePinetown, VN Naik School for the Deaf kanye ne-St Martin De Porres Comprehensive bese kuthi uMgungundlovu uphumelele ngo-100%.

Isifundazwe saKwaZulu-Natali sinyuse izinga lokuphasa kukamatikuletsheni elingu-89.5%, uma kuqhathaniswa no-86.4% owatholakala ngo-2023.

Isifunda uMkhanyakude yisona sifunda esisebenze kahle kakhulu esifundazweni futhi sikleliswe endaweni yesithathu ezweni lonke njengoba siphumelele ngo-92.8%.

UMnuz. Ntuli uphinde wathumela umyalezo kubafundi abaphamulelanga. “Lokhu akukona ukuphela komhlaba, umnyango uphethe uhlelo lwamathuba esibili, olunikeza ithuba lokubhala kabusha,” kusho uNtuli.

“Isifundo esisodwa sempilo siwukuthi ungayeki. Hlala uzama, njengoba isisho sithi, ‘impumelelo ayilinganiswa ngenani lezikhathi owawa ngazo kodwa ngenani lezikhathi ovuka ngazo uphinde ubhekane nohambo”, kusho uMnuz. Ntuli.

Umthombo: UThukela News Times