AMA-HAWKS APHENYA NGABADAYISA IMIPHUMELA KAMATIKULETSHENI

UMNYANGO wezemfundo eyisisekelo kuleli usujube amaphoyisa ophiko lwama-Hawks ukuthi aphenye ubugebengu bokuqolwa kolwazi oluqukethe imininingwane yabafundi abebenfunda ibanga leshumi ngo-2024. Ungqongqoshe wawo umnyango, uSiviwe Gwarube useqinisekise umphakathi ukuthi uzokuthathela izinyathelo lobugebengu kulandela ukutholakala kombiko wokuthi kunabantu abadayisa imiphumela yabafundi ngemali engu-R100.

Ekhuluma esithangamini sabezindaba ngaphambi kokumenyezelwa ngokusemthethweni kwemiphumela ungqongqoshe ukuqinisekisile ukuthi umnyango uyasiphenya lesigameko. Uzwakalise ukukhathazeka kwakhe ngalolu daba wabe esethi uma kuwukuthi kukhona abangaphakathi emnyangweni abathinteka kulokhu bazobhekana nabo mahlanze.

Ungqongqoshe uthe okwamanje angeke aphike ukuthi kungenzeka lobu ubugebengu bezoxhakaxhaka (cyber crime), ngalokho sebejube uphiko lwama-Hawks ukuthi luphenye.

Ubuye waqinisekisa abazali ukuthi yize bethole lo mbiko olulaza imiphumela kamatikuletsheni, ubuqotho bemphumela busengathenjwa.

UNgqongqoshe uGwarube kulindeleke ukuthi adedele imiphumela kamatikuletsheni ka-2024 ngoMsombuluko kusihlwa. Bazinkulungwane ezingamashumi ayisishiyagalolunye abafundi ababhale izivivinyo zikamatikuletsheni ngonyaka odlule.

Inhlangano eqinisekisa ubuqothoo bemiphumela kamatikuletsheni, Umalusi ithe konke sekumo ngomumu ngemiphumela kamatikuletsheni futhi ayinagcobho.