EZISEMATHENIEzosaziwayoIzindaba

OWE MANDENI SHUTDOWN NYE UFUNA IZIMPENDULO KU-EMTEE OBACHAYISILE

ABAHLELI bomcimbi omkhulu wokuhlukanisa unyaka iMandeni Shutdown NYE obukwaNgcedomhlophe Stadium eSundumbili ngomhlaka-31 Zibandlela 2024 nangomhlaka-1 Masingana 2025 basalwa eyokungafiki komculi we-Hiphop, uMthembeni ‘Emtee’ Ndevu kulo mcimbi yize ubesekhokhelwe. U-Emtee ubevela ezithombeni ebezikhangisa ngalo mcimbi njengomculi oyisimenywa esiqavile (main act) nokho ugcine engafikanga.

Abalandeli abakhe baphoxeke kakhulu kangangokuthi bagcine besola abahleli bomcimbi ngokuthi babashaye ngemfe iphindiwe.

Iphephandaba i-City Press libikile ngalolu daba nalapho lidalule khona ukuthi line-invoice okukholakala ukuthi ibivela ku-Emtee yemali engu-R35 000 ebihlanganisa izindleko zendiza kanye nendawo yokuhlala.

Umhleli womcimbi, uBitso Thwala uthe basebenzise imali engu-R50 000 ukulungiselela ukufika kuka-Emtee besebenzisana nomuntu obizwa ngo-Brian abebekholwa ukuthi ungumphathi ka-Emtee.

Isithombe: Obezibiza ngo-Brian okusolwa ukuthi uqole abahleli bomcimbi iMandeni Shutdown NYE

“Akafikanga. Sizamile ukuxhumana nabo kodwa basiziba. Abakaze basho lutho kithina. Kwale noma sesibathumela i-email [ngoLwesine nangoLwesihlanu] sisho ukuthi ‘siniqashile, sisebenzisana no-Brian kwenzakalani?’ Akekho osiphendulile. Sifonele umphathi, samzama naku-Whatsapp kodwa wasiziba”, kusho uBitso.

UBitso utshele UMKHAYA ukuthi ubehlela lomcimbi esebenzisa inkampani eyi-marketing agency kaMandla Madibe oke wamsiza ukuthola abanye abaculi abadumile abafana no-Kelly Khumalo, Dbn Gogo nabanye. “U-Brian ungifonele wathi kimi inombolo kamakhalekhwini wami uyithole kuMandla. Uthe ungumphathi ka-Emtee, uma kwenzeka sidinga u-Emtee emcimbini singaxhumana naye. Ube esengikhombisa amaphepha enkontileka nama-invoice awasebenzisayo uma kuqashwa lo mculi.

“Noma ngiqale ngayiziba lento ka-Emtee, ngoba bengisazama ukuthi sithole amanye amaciko inkinga abantu ezinkundleni zokuxhumana bebesibelesele bethi asifake abantu be-Hiphop ohlwini lwamaciko esizowaqasha emcimbini weMandeni Shutdown NYE. Ngizithole ngiphoqeleka ukuthi ngilalele okufunwa abantu ngoba umcimbi ngisuke ngiwenzela bona.

“Ngibe sengixhumana noMandla ukuthi akafake u-Emtee ngoba vele senginayo indlela yokuxhumana naye. UMandla uthe asime kancane ngabantu be-Hiphop. Into engiyibukile ukuthi umuntu owazi abantu bangakithi nabakufunayo imina. Ngabe sengimazisa ukuthi axhumane naye lo-Brian futhi ubevele eshilo [u-Brian] ukuthi inombolo yami uyinikwe uyena uMandla nokwenze ngamethemba”, kusho uBitso.

Uthe baqalile ukuxoxisana no-Brian ukuze kuqashwe u-Emtee. Emuva kwalokho u-Brian ube esemyalela ukuthi afake imali yokukhokhela izindleko zokuhamba nezokuhlala ukuze afike lo mculi.

Uthe ukhokhe imali yesibambiso (deposit) eyizindleko zokuhlala nokuhamba njengokuyalela kuka-Brian.

“Inkinga ngokuqasha abantu abadumile ukuthi awuxhumani nabo ngqo kodwa usebenzisana nabaphathi babo uze uqede. Manje ngangithembe ukuthi u-Brian ungumphathi wangempela ka-Emtee. Sasilokhu sixhumana ngosuku lomcimbi, esho ukuthi sebekuphi manje. Salinda kanjalo elokhu esho ukuthi bakuphi manje kwaze kwasa bengafiki’, kusho uBitso.

UMandla uphawulile ku-City Press ethi abantu ababehambele umcimbi befuna ukubona u-Emtee babelokhu bebasola ngokuthi benze isikhangiso somcimbi esingamanga. Uthe uma kuwukuthi abethimba lika-Emtee bathathe imali yabo kodwa banquma ukungezi emcimbini wabo abaxolise futhi bebuyise imali yabo.

“Uma kuwukuthi siqoliwe ngempela, singathokoza uma yena nethimba lakhe bengaphendula ama-email ethu besho ukuthi siqoliwe”, kusho uMandla.

Uthe bengakujabulela ukuthi u-Emtee akhiphe isitatimende achaze ngalokhu. Uthe ukuzitshwa kwama-email abo kubatshela ukuthi kungenzeka ukuthi abaqoliwe ngoba abaphathi baka-Emtee bebezobona lama-email abo besukumele phezulu.

Ngokombiko we-City Press abeBitso Entertainment okuyinkampani kaBitso baxhumane nabaphathi baka-Emtee, abakuqinisekisile ukuthi uzotholakala ngosuku adingeka ngalo. Bona babe sebenza isikhangiso somcimbi futhi konke kukuhle. “Siqinisekise nomphathi wakhe ukuthi uzonandisa ngokugamanxa kwehora lesibili (02:30) ekuseni. Sibe sesimqashela indawo yokuhlala ehhotela eliseBallito. Size saqasha ngisho imoto ebizomthatha esikhumulweni sezindiza imuse ehhotela, bese esuka ehhotela eze emcimbini”, kusho uMandla.

Isithombe: Isikhangiso somcimbi iMandeni Shutdown NYE esinesithombe sika-Emtee

I-City Press ikhuluma nonkosikazi ka-Emtee, u-Nicole Chinsamy obuye abe umphathi wezindaba zakhe uthe abamazi umuntu ongu-Brian ngoba uyena kuphela obhekene nomsebenzi wokuqashwa kuka-Emtee. Uthe umcimbi abewazi yena abeqashwe kuwo u-Emtee ngokuhlukana konyaka i-Last Dance Music Festival ebidlala ku-SABC 1, e-Royal Showgrounds eMgungundlovu.

Uqhubeke wathi ukube abahleli beMandeni Shutdown bebexhumane naye ku-email yakhe ekuqaleni ubezobazisa ukuthi ngeke atholakale u-Emtee ngoba ubesevele eqashiwe.

I-City Press ibike ukuthi kungenzeka ukuthi iBitso Entertainment iqolwe ngempela ngoba i-invoice ebisetshenziswa ibine-logo negama lenkampani edayisa impahla yasendlini. Okunye okuvezwe ileli phephandaba ukuthi bekuhlelwe no-Emtee ukuthi naye afake isikhangiso somcimbi weMandeni Shutdown NYE kodwa okungenzekanga nakuba bebelokhu bebheka ukuthi kuyenzeka yini lokhu. Ikhasi le-X (ebiyi-Twitter) okuthathwe kulona inombolo ka-Brian livulwe ngo-2020, linosuku lokuzalwa okungesilo elika-Emtee, bekugcinwe ukubhala kulo ngo-2021 ngaphambi kokuthi kubhalwe futhi ngoZibandlela ngonyaka odlule.

UBitso ophinde abe ngu-DJ utshele UMKHAYA ukuthi inkinga abanayo manje ngo-Emtee nethimba lakhe ukuthi akukho abakwenzayo ukuziqhelelanisa naso sonke lesi simo, kunalokho ngathi akwenzeke lutho.

INTATHELI YOMKHAYA

UMKHAYA iziko lezindaba elibika ngolimi lwesiZulu izihloko ezisematheni, ezosaziwayo, ezemfundo, ezemidlalo kanye nangabantu abenza izinto ezinhle emphakathini. Sibika zonke izindaba ngokuthembeka, ngeqiniso nangobuqotho.