OKWENZE UMANDLA MAGWAZA WACELA INDLELA OKHOZINI
IPHEPHANDABA elibhala ngesiZulu, Ilanga kuthe ngoLwesibili mhlaka-24 Zibandlela labika ukuthi usule isigubhukane emsakazweni Ukhozi FM uMandla ‘Njinji’ Magwaza obenza uhlelo olungena njalo ngoMgqibelo ngehora lesishumi nambili emini kuya kwelesithathu ntambama, Ukhozi FM Top 20.
Kuthiwa lezi zindaba zokusula kwakhe abanye ozakwabo bazizwe ngomphathi wezinhlelo obambile uMandla Mdletshe kwi-group ka-Whatsapp yabasakazi. UNjinji uke wenza uhlelo lokuhlukanisa unyaka kuphunywa ku-2023 kungenwa ku-2024 ebambisene noNonhlanhla ‘Mroza’ Buthelezi ngesikhathi ingoma eyahlukanisa unyaka kuba ekaKhuzani.
Umyalezo okuthiwa ubhalwe nguMdletshe uthi: “Sanibonani bozakwethu, ngicela ukunazisa ukuthi uzakwethu uMandla Magwaza wesulile emsebenzini. Simfisela okuhle kulokhu asazoqhubeka akwenze empilweni”.
Sekuyinsakavukela ukusula kwabantu kulo msakazo njengoba ezinyangeni ezedlule kusule obengumphathi wezinhlelo u-Pearl Maseko owakhala ngesikhulu ebesiphethe umsakazo ethi senza kubenzima ukusebenza. Emuva kwakhe kusule sona isikhulu abekhala ngaso, uSbongi Ngcobo. Ziningi ezinye izikhalo ezike zavela ngendlela abephethe engayo uSbongi kulo msakazo.
UMandla yena kubikwa ukuthi incwadi yokwesula uyifake ngoMsombuluko mhlaka-23 Zibandlela 2024 kanti isinqumo sakhe sithuse abaningi kwazise usebe yingxenye yalo msakazo iminyaka ecela eshumini.
Ngokwemibiko engaqinisekisiwe kuthiwa kunophenyo obeluqhubeka ngaye emuva kokufaka izicelo (claims) zemali yomholo wezinsuku angazisebenzanga, nokusolwa ukuthi yikho okumenze wacela indlela. Phakathi kokunye abephenywa ngakho ukufika emsebenzini engekho esimeni esikahle sokusebenza. Kuke kwaba nezinsolo zokuthi unobudlwelano bezothando nobengumphathi wakhe uSbongi. Uke futhi wasolwa ngokudlala emoyeni isikhangiso ebesingagunyaziwe, nokwamfaka enkingeni kodwa wabuye waphunyuka, kanti uphinde walwa nomunye wozakwabo endaweni esobala nokungavelanga ukuthi babebangani. Uzakwabo okwabikwa ngaye ukuthi walwa naye uBabheke Mthethwa naye ongumdidiyeli kulo msakazo.
UMandla uke wasebenza njenge-technical producer ezinhlelweni eziningi Okhozini okubalwa kuzo iVuka Mzansi Breakfast Show kanye nohlelo iJabulujule olwezniwa uDudu Khoza, ukubala ezinye izinhlelo aseke wazididiyela. Uphinde wazakhela udumo ngokwenza izikhangiso ngephimbo lakhe elibhodlayo. Usanda kuthola ithuba elingqayizivele lokwenza uhlelo lukamabonakude ebelibheka amathalente kumaciko afufusayo emculweni, uShuni Womhlaba abelwenza nomsakazi we-Metro FM, uMpumi Mlambo.
