URELEBOHILE MOFOKENG UBAQWAQWADE AMAKHANDA BONKE KWEZEMIDLALO EGOLI
ISIBABULI somdlali we-Orlando Pirates, uRelebohile Mofokeng uhlabane ngomklomelo obalulekile kwezemidlalo ahlule kuwo osondonzima kwezemidlalo abeqokwe nabo. UMofokeng ukhale wemuka nendondo ye-Sports Personality of the Year kuma-Gauteng Sports Awards ehlula o-Ronwen Williams weMamelodi Sundowns, umshayisibhakela u-Dricus Du Plessis, umgijimi u-Akani Simbine no-Tatjan Smith owanqoba kabili ama-Olympic.
Lo mcimbi ubuwenzelwe e-Auckland Park Campus yase-University of Johannesburg ngeSonto.
Lo mdlali waMabhakabhaka oneminyaka engamashumi amabili (20) ilokhu eqhubeke njalo nokuqhakaza ngaphansi kwesandla somqeqeshi wakhe u-Jose Riveiro. Ukuvelela kwakhe ebholeni sekuholele ekutheni athole ukubizwa njalo nakwiBafana Bafana.
Ngonyaka odlule unqobe izindondo eziningi emcimbini wokuklomelisa abadlali ku-Premier Soccer League (PSL) yakuleli, kuhlanganisa neye-Young Player of the Season. Ubambe iqhaza elikhulu iqembu lakhe linqoba kabili i-MTN8 kanye ne-Nedbank Cup.
Emcimbini obuyizolo ubemelwe umama wakhe u-Naomi Mofokeng jengoba yena umatasa nezinhlelo zeqembu lakhe. Unina uveze ukuthi uthokozile ngokuhlabana kwendodana yakhe ngale ndondo ye-Sports Personality of the Year.
“Njengomama kaRelebohile ngizizwa ngihlonipheke kakhulu ukuba ngibe lapha namuhla ukuzokwamukela indondo yomtanami. Ngibusisekile ngokuba nomntwana ofana naye. uRelebohile uhlezi ehlonipha futhi uzothile. Ngifisa ukubonga kakhulu bonke abamvotele”, kusho umama wakhe.
URelebohile use-Algeria lapho ehambe khona ne-Pirates ukuyodlala khona umdlale we-CAF Champions League Group C ne-CR Belouizdad enkundleni i-Stade D 5 Juillet ngoLwesibili ebusuku.