UGWETSHIWE OBEFUNDISA NGEZIQU EZIWUMBOMBAYI
EMUVA kweminyaka emihlanu efundisa ngeziqu zemfundo eziwumbombayi uthisha waseSobethu Primary School, ugwetshwe iminyaka emihlanu inkantolo i-Richards Bay Regional Court ngoMsombuluko. UMnuz. Edward Nkosi oneminyaka engamashumi amahlanu nane (54) ugwetshwe iminyaka emihlanu elengisiwe ngecala le nkohlakalo emuva kokuthola umsebenzi nge-diploma engumbombayi athi wayithola e-Rand Afrikaans University (esibizwa nge-University of Johannesburg).
Inkantolo ithole ukuthi phakathi kuka-2012 no 2017 umnyango wezemfundo KwaZulu wakhokhela uMnuz. Nkosi imali engu-R161 750.25 okuyinkokhelo ayithola ngenxa yezicucu zomgunyathi ayezinike umnyango. Lo mnyango ukhokhele lo thisha le mali nakuba ubudonsa kanzima ngasezimalini.
Kuze kwamshela ngesikhathi kwenziwa uhlelo oluvame ukwenziwa lokuhlola izicucu zabasebenzi bomnyango. Kuthe ngoMbasa 2019 sekutholakele ukuthi uMnuz. Nkosi yonke le minyaka ubebamba umnyango kwabe sekuvulwa icala esiteshini samaphoyisa iPongola Police Station.
Icala labe selithuthelwa ophikweni lwama-Hawks oluseThekwini, i-Durban Serious Commercial Crime Investigation Unit. Emuva kokwenziwa kophenyo olunzulu ama-Hawks athola ukuthi uMnuz. Nosi akakaze ayithole i-diploma e-Rand Afrikaans University.
“UMnuz. Nkosi waboshwa wabekwa amacala emuva kokutholakala ukuthi wenza inkohlakalo. Uvele enkantolo amahlandla amaningi, waze wagwetshwa ngomhlaka-4 Lwezi enkantolo yase-Richards Bay lapho atholakale khona enecala wabe esethola isigwebo seminyaka emihlanu elengisiwe”, kusho okhulumela amaphoyisa u-W/O Sibu Ncane.
Isigwebo sakhe sihambisana nembandela ebucayi kwazise akufanale atholakale enza enye inkohlakalo ngalesi sikhathi esadonsa lesi sigwebo esilengisiwe seminyaka emihlanu. Uphinde wagixabezwa ngesigwebo sezinyanga ezingamashumi amathathu nesithupha noma akhokhe imali engu-R20 000.
