KUBUKEKA sekubashubela abasolwa abavele enkantolo i-Pretoria High Court ngecala lokubulala owayengunozinti we-Orlando Pirates, uSenzo Meyiwa njengoba ufakazi wombuso u-Brigadier Bongani Gininda ethula ubufakazi obubafaka ngaphansi kwebhasi. U-Br Gininda ongumphenyi waleli cala ulokhu eqhubekile nokudedela amakati esakeni njengoba izolo [ngoMsombuluko] nanamuhla [ngoLwesibili] ethula ubufakazi.

Laba babuchitha ubufakazi obethulwa iphoyisa uSizwe Zungu owafakaza kule nkantolo wathi bonke abasolwa babesehostela eBasuthwini e-Vosloorus ngobusuku okwabulawa ngalo kuSenzo.

Enkantolo u-Br. Bongani Gininda uveza ubufakazi obuthi umsolwa wokuqala uMuzi Sibiya walisabisa ngempela iphoyisa uSizwe Zungu. Kulo bufakazi bakhe uqinisekisa ukuthi inombolo eyafonela uZungu ngeyakhe uSibiya. Uthe waqala ngokumfakela umyalezo wokuthi amfonele (call back).

USibiya waphika ukuthi wayeseGoli ngoMfumfu 2014. U-Br. Gininda ube eseveza ubufakazi basebhange uSibiya ekhipha imali eseGoli. U-Br. Gininda uvezele inkantolo ubufakazi bokuthi lemali eyakhishwa uSibiya wayesebenzisa i-account yasebhange laseCapitec ayivula esebenzisa ikheli laseBasuthwini. Ngaleso sikhathi umakhalekhukhwini kaSibiya wawudonsa embhobheni wase-Vosloorus.

Ngakokunye uhlangothi umndeni wakaMeyiwa kuningi osukuveze njengezinto ezibambezela leli cala kanye nokukhathazeka kwawo ngofakazi abaningi asebefile kuleli cala, okholwa ukuthi kunobufakazi obuningi obungeke kuvele enkantolo okwabonwa nobekwaziwa yibo.

Kune-video lapho umfowabo kaSenzo, uSfiso Meyiwa egeqa amagula ngokuqhubeka kuleli cala nangezinsolo anazo ngephoyisa elingufakazi kuleli cala, u-Br. Gininda. Ngokusho kukaSfiso uBr. Gininda ungufakazi ongathembekele kuleli cala njengoba azama ukudukisa isitatimende esasenziwe umlamu wakhe [uSifiso] uSipho Hlophe. Lesi sitatimende sasiveza ubufakazi bokuthi uSenzo wadutshulwa umuntu owayesendlini. Lokhu kwavela ngokuthi uTumelo Madlala afonele uSipho emazisa ukuthi uSenzo “usedubuleke ngephutha”.

USfiso kule-video uthe u-Br. Gininda ungufakazi wokugcina wombuso osohlangathini lwabathi kwangena izigebengu endlini okwadutshulelwa kuyona uSenzo.

Emuva kwakhe kuzobe sekubizwa abazokhuluma iqiniso ngokwenzeka ngelanga okwafa ngalo lo nozinto obebuye avimbele iqembu lesizwe lebhola, iBafana Bafana.