UMAWHOO USABISA NGOKUBOPHA UMHLELI WEMICIMBI ONAMANGA
UMCULI wakuleli ongenisile kulezi nsuku, uThandeka ‘MaWho’ Ngema usesabise ngokubopha umhleli nomgqungquzeli wemicimbi osenga ezimithiyo, u-Edmond ‘Eddz’ Mafokwana. Lokhu kuza emuva kokuba uMaWhoo engayanga emcimbini i-Blouberg Spring Festival owawuseLimpop mhlaka-28 Mandulo.
Ngokuthola kweziko lezindaba i-Sunday World kuthiwa u-Eddz wayengumxhumanisi phakathi kwenkampani kaMaWhoo, iMaWhoo Entertainment nabahleli bomcimbi.
Umsebenzi wakhe kwakuwukuletha uMaWhoo kulo mcimbi futhi wakhokhelwa imali engu-R35 000 ukuba enze lokho. Akutholakalanga nokho ukuthi imalini ayezoqashwa ngayo uMaWhoo futhi akucaci ukuthi u-Eddz wayefune ukukhokhelwa malini ngokwenza lokhu.
UMaWhoo wodumo lwengoma ethi ‘Umshado‘ ubhale ekhasini lakhe ezinkundleni zokuxhunama ecacisa ukuthi yena akakaze aqashwe kulo mcimbi okukhulunywa ngawo futhi akukho mali ayithola ngawo. Ngalokho yikho engakaze aye kuwona.
Omunye wabahleli bemicimbi akakuthandanga lokhu okubhalwe uMaWhoo wabe esebhala ekhasini lika-Facebook washiya angalazi kuMaWhoo.
Akazithelanga ngabandayo uMaWhoo naye waphendula ngokubhala isitatimende esiqondise u-Eddz. “Ngokuzithoba ngicela umgqumgquzeli wemicimbi obizwa ngo-Eddz ukuthi ngokushesha nje ayeke ukusabalalisa amanga nokukhuluma izinto ezehlisa izithunzi ngami kanye nomsebenzi wami womculo”, kusho uMaWhoo.
“Ukwenza kwakho kungehlisa isithunzi futhi kungaholela ekulimaleni komsebenzi wami kanye nempilo yami.
“Amanga owaqambe ngami, ukuthi angiyanga emcimbini we-Blouberg Spring Festival eSenwabarwana eLimpopo ayikho engekho futhi ayichilo”, kusho uMaWhoo.
Isitatimende siqhubeka sithi: “Ithimba lami liyaxhumana nabagqugquzeli ngaphambi kwayo yonke imicimbi engiba ingxenye yayo, manje kulo mcimbi okhuluma ngayo angikaze ngiqashwe noma nginikezwe i-deposit”, kusho uMaWhoo.
“Nginabo ubufakazi balokhu engikhuluma ngakho. Ngiyaziqhenya ngomsebenzi wami futhi ngisebenza kanzima ukwakha igama lami endimeni yomculo.
“izinto ozishoyo zingehlisa isithunzi futhi zilimaza igama lami ngendlela engizwisa ubuhlungu, kanti lokhu kungaholela ekuthini ngingabe ngisaqashwa ndawo futhi abantu bengathandi ukusebenzisana nami.
“Ngiyakucela ukuba uyeke ukukhuluma amanga ngami futhi ususe konke okubhale ezinkundleni zokuxhumana ngami. Uma uhluleka ukukwenza lokho kuzoholela ekutheni ngithathe izinyathelo zomthetho”, kusho uMaWhoo.
Ebuzwa u-Eddz ngakho konke lokhu okushiwo uMaWhoo uthe: “Ngiyazi ngalokho okushiwo uMaWhoo nokuthi uzongithathela izinyathelo zomthetho kodwa lolu daba selulungisiwe. Kumele ngabe usesikhiphile lesitatimende sakhe ku-Facebook”, kusho u-Eddz.
Nokho ithimba elisebenza noMaWhoo liyakuchitha lokhu okushiwo u-Eddz. Umphathi kaMaWhoo, uNoxolo Ngema uthe akazi ukuthi ukhuluma ngani u-Eddz. “Ngeke simncenge lona”, kusho uNoxolo.