ODILIKA JELE ABANGU-5 KWABABULALA AMAPHOYISA BECASHE NGESONTO
ABAZALWANE mbumbulu bebandla iMancoba Seven Angels Ministries abangena esiteshini samaphoyisa eNgcobo ngo-2018 badubula amaphoyisa amahlanu bagwetshwe odilika jele abahlanu nezigwenye izigwebo zeminyaka ehlukene umuntu emunye yinkantolo iMthatha Magistrate Court ngoLwesithathu.
Laba solwa abango-Andani Monco (36), Kwanele Ndlwana (28), Siphosomzi Tshefu noPhumzile Mhlatywa (51) bagwetshwe emuva kokulahlwa amacala amahlanu okubulala, amabili okuzama ukubulala, inqwaba yamacala okutholakala nezibhamu kanye nezinhlamvu ezingekho emthethweni, inqwaba yamacala okuphanga kuhlonyiwe nawokugqekeza emizini yabantu ngenhloso yokulimaza ngoNhlaba nonyaka.
UNdlwana noTshefu bazodonsa iminyaka engamashumi amane nodilika jele abahlanu betholoza ejele. Laba bobabili kuthiwa batholakale benelinye icala lokuphanga izibhamu emaphoyisa ayesebenza eziteshini zamaphoyisa e-Butterworth nakuCala ngokulandelana. Lezi bhamu yizo ezasetshenziswa ekuduneni amaphoyisa esiteshini sasEngcobo.
UMonco ugwetshwe iminyaka engamashumi amathathu nanhlanu ebhadla ejele kwathi uMhlatshwa yena wagwetshwa engamashumi amabili nanhlanu etholoza ejele.
Omunye abebeboshwe naye uSiphesihle Tatsi wagwetshwa iminyaka eyishumi nesishiyagalombili ebhadla ejele njengoba engayichithelanga inkantolo isikhathi ngokusheshe awavume onke amacala ayebekwe wona ngomhlaka-27 Ntulikazi 2023.
Ngokwemininingwane esenkantolo kuthiwa ngomhlaka-21 Nhlolanja 2018 laba solwa abebehlala endlini yesonto batheleka esiteshini samaphoyisa Engcono, bafika bangabuza lutho, badubula amaphoyisa kwancane indawo. Bathatha izibhamu zawo base beyozama ukugqekeza imishini yokukhipha imali (ATM’s).
Ngosuku ababoshwa ngalo laba kunabanye abasolwa abadutshulwa amaphoyisa, kungasasiniswa mahleza. Izigwebo zabo laba abagwetshiwe umuntu emunye uzosidonsa kanyekanye nodilika jele abahlanu.
Amaphoyisa amahlanu abulawa Engcobo ngoZuko Mbini (46), Kuhle Mateta (27), Nkosiphendule Pongco (32), Sibongiseni Sandlwana (32) noZuko Ntsheku (38).