U-PENNY NTULI UBUYELA EMOYENI EMUVA KOKUXINWA UKUGULA
ISILOMO somsakazi weJozi FM, u-Penny Ntuli sibuyele ohlelweni lwaso namuhla [ngoMsombuluko] olungena phakathi nesonto emuva kokuxinwa ukugula okusolwa ukuthi kubangelwe amakhaza. u-Penny ungomunye wabantu abavaleleka emgwaqeni u-N3 ngase-Mantrose mawubheke e-Free State noma KwaZulu-Natali ngesikhathi kumboze iqhwa elaholela ekubhajweni kwenqwaba yezimoto.
Ikhasi lo msakazo ku-Facebook iJozi libhale ekhasini ukuthi u-Penny uyabuyela emsakazweni namuhla. “Uyabuya u-Penny Ntuli emoyeni. Uzohlala nawe zonke izinsuku phakathi nesonto kusukela ngelesi-9 kuya kwelesi-12 emini”, kusho umbhalo ekhasini lalo msakazo.
U-Penny wenza uhlelo i-Mid-Morning Chat kulo msakazo osakazela eDube eGoli, ngoMsombuluko kuya kuLwesihlanu phakathi kwehora lesi-9 ekuseni kuya kwelesi-12 emini. Uqale ukusebenza kuJozi FM ngoNhlaba emuva kokulaxaza iGagasi FM ngoba engazwananga nomphathi wakhe u-Ayanda Melansi ngomholo ongu-R2 800 ayezowuhola ngenyanga.
Abalandeli bakhe bajabule kakhulu ukuzwa izindaba zokuthi intandokazi yabo ibuyela emoyeni. USbo Fown Heaven ubhale okusankondlo ekhombisa intokozo yakhe:
“Yangena inkosazane yeqhwa ezinye kuzinkosazane zamanzi!,
Umanikela nge-update ku-N3,
Lasho ngaphakathi i-N3 Elihle, uMphemba owaphemba amaqhwa kuzifundazwe i-KZN, Eastern Cape kanye ne-Free State,
Iqanda lesizwe, iqanda lase-Natal,
Ngithi mthinte phela uzokubona okwakhweza ikati emthini,
2.8 inamba encane eyamsusa e-Natal yamyida eJozi!,
Bathi uyabanda-snow white kodwa hhayi yonke indawo!,
IsiZulu asitolikwa, ungangibuzi!
Bathi emakhazeni usu-qualified kusebenza khona,
Bathi kwi-ice cage usu-qualified kuphila khona,
Waphenduka-ice cream, wafa ukukhothwa!!!”
U-Penny kanye nayehamba nabo bahlale izinsuku ezimbili emgwaqeni u-N3 beququdwa amakhaza, emuva kwalokho uphuthunyiswe esibhedlela lapho abelulamela khona.
