EZEMIDLALOEZOMPHAKATHI

INQOTSHWE I-SMF FC IMIDLALO EBIXHASWE UMKHAYA

IQEMBU elisungulwe ngo-2023, i-SMF FC lidle umhlanganiso linqoba imidlalo i-2nd Annual Macambini Heritage Invitational 2024 ebidlalwa ngoLwesihlanu, mhlaka-27 Mandulo enkundleni yemidlalo i-Magic Sportsgrounds. Le midlalo iqale ukudlalwa ngonyaka odlule nobese kungokwesibili ikhona kulo nyaka.

Ngonyaka odlule yanqotshwa i-Real Magic FC, lapho kwakuboshelwe amaqembu i-Mighty Rovers, Sea Robbers ne-SMF FC okuyiyona emema amaqembu njengoba kuyiyona osokhaya. I-SMF FC yesekwa Umkhaya Media Group Pty Ltd engaphansi kukaMnuz. Sphamandla Mthethwa ophinde abe umhleli weziko lezindaba Umkhaya.

I-SMF FC inqobe le midlalo emuva komdlalo wamanqamu obushubile phakathi kwayo ne-Bayern FC. Ngaphambi kowamanqamu i-Bayern FC iguqise uHwebede Cosmos FC sekukhahlelwa ama-penalty kanti i-SMF idle iLambothi Academy ngegoli elilodwa eqandeni.

Izinga lale midlalo kulo nyaka belithe ukunyuka kanti nomklomelo ubungconywana kunonyaka odlule. Ngonyaka odlule amaqembu amane ayedlalela imali engu-R800, kanti kulo nyaka bekudlalelwa imali engu-R1000. Amaqembu abencintisana kulo nyaka i-Lambothi Academy, Hwebede Cosmos FC, Bayern FC kanye SMF FC.

Isithombe: Abadlali beqembu i-Bayern FC ngaphambi komdlalo we-semi final

Isithombe: Abadlali beqembu uHwebede Cosmos FC ngaphambi komdlalo we-semi final

“Ngonyaka ozayo ngifisa ukwenza into enkulu kakhulu. Noma kunzima ukuthola abaxhasi kodwa ngizolokhu ngingqongqoza kosomabhizinisi abehlukene ukuze abafana bekhuthazeke ukuzibandakanya nezemidlalo futhi bengabi nesikhathi esiningi sokuzibandakanya nezinto ezingalungile”, kusho uMnuz. Mthethwa.

Uveze ukuthi le midlalo uyiqambe ngokuthi iMacambini Heritage Invitational ukuze agqamise indawo nesizwe sakhe futhi uyafisa ukuthi ngelinye ilanga le midlalo ihehe abantu abazoyeseka ngemali nangezinsiza-kusebenza. “Ngokuhamba kwesikhathi uma konke sekuhamba kahle futhi sikhula singayisabalalisa nakwezinye izindawo simeme namaqembu avela ngaphandle kwaseMacambini kodwa okwamanje sisagqamisa indawo yethu”, kusho yena.

“Sinamagugu adinga ukugqanyiswa nokugcinwa eMacambini kodwa abantu abahlala khona abangazi luthi ngawo. Singasebenzisa ezemidlalo ukukhuthaza nokwazisa abantu abasha ngawo lamagugu futhi ngaphambi kokuthi kudlalwe kungaba ne-tour lapho kuzofundiswa khona amaqembu angenele imidlalo ngawo amagugu nemilando yesizwe sethu”, kusho uMnuz. Mthethwa.

Kuzokhumbuleka ukuthi lemidlalo iba njalo ngenyanga yamagugu uMandulo ngenhloso yokugubha nokujabula nabantu

INTATHELI YOMKHAYA

UMKHAYA iziko lezindaba elibika ngolimi lwesiZulu izihloko ezisematheni, ezosaziwayo, ezemfundo, ezemidlalo kanye nangabantu abenza izinto ezinhle emphakathini. Sibika zonke izindaba ngokuthembeka, ngeqiniso nangobuqotho.