ABANTUIzindaba

UPHOKOPHELE UKUYA KUDE U-AMANDA WE SAKHA ISIZWE FM

USEBENZA kanzima umsakazi weSakha Isizwe FM, u-Amanda ‘Stockorh’ Jali (18) ukuze aphile impilo yamaphupho akhe. U-Amanda ungowokudabuka endaweni yaseBhekulwandle lapho ehlala khona nomndeni wakhe.

Uqede umatikuletsheni ngonyaka ka-2022 e-Adams College eThekwini lapho abenza khona izifundo zeSayensi. Ube eseqhubeka nokufunda ngo-2023 efundela i-Computer (Basic literary in Computer), waphinde wafunda i-Upholstery in Furniture Making (Carpentry) NQF Level 2 esikhungweni sokuqeqeshela amakhono Udumo Training Centre. Uphinde wenza izifundo ze-Business Management and Fundamental Marketing khona e-Udumo Training Centre.

Mayechaza u-Amanda uthi: “Ngikwazi ukuqala lonke uhlobo lwe-furniture kuhlanganisa nale eyakhelwa odongeni (built in)”,

Kuthe ngo-2023 wabe eseqala ibhizinisi lokudayisa izipho lokhu okubizwa ngama (gift hampers) elisaqhuba kahle kuze kube imanje.

Isithombe: Esikhombisa izipho ezidayiswa u-Amanda

Ngo-2024 ubhalisele ukufunda e-University of South Africa wabe esenza izifundo ze-Public Relations and Communication lapho abefundela khona ukuqeda i-diploma.

NgoNhlaba uthole ithuba lokungena emsakazweni Isakha Isizwe FM, wanikwa uhlelo i-Mid Morning Magic olungena ngoMsombuluko kuya kuLwesithathu phakathi kwelesi-09:00 ekuseni nelesi-12:00 emini kanye nohlelo Amandla Asentabeni njalo ngoLwesine ngesikhathi esifanayo.

Le ntokazi ekhuthele futhi enomfutho uma isemoyeni kuningi ekwenzayo njengoba iphinde ibe ngumlingisi wase-theater nakuma-drama series asemalokishini. Uphinde abe i-brand ambassador yenkampani yezingubo zokugqoka.

Eqhubeka echaza u-Amanda uthe wayengakaze acabange ukuthi uyoke abe umsakazi okufakazela lokho izifundo ayezenza esasemabangeni aphansi emfundo ezazingahlangene nhlobo nezokusakaza. Uthe amazwi azigqugquzela ngawo empilweni ngathi: “Mina ngingumuntu wabantu, ngiyajabula futhi ngiyathanda ukusiza abantu ikakhulukazi kulaba abanezinhloso zokuthuthukisa imiphakathi kanye nalaba abanamakhono ezobuciko”.

Okunye akwenzayo ukuba iqhikiza leqembu lezintombi Intwenhle P.R. ngakubo. Uthe akufisayo ukuthi athuthukise umphakathi wangakubo futhi agqugquzele izingane ezisakhula ukuthi zifunde ukuzimela nanokuthi akukho ongakwenza ngaphandle kokuzethemba kanye nokumesaba uNkulunkulu.

Isithombe: Esinemininingwane yokuvotela u-Amanda kumncintiswano weSakha Isizwe FM Community Awards

U-Amanda uqokelwe kumncintiswano emibili yezindondo i-Live Your Dream emkhakheni we-Best Female Presenter kanye neSakha Isizwe FM Community Awards emkhakheni we-Best Female Presenter nowe-Best Show. Ucela ukuvotelwa futhi angajabula kakhulu uma enganqoba lezindondo.

INTATHELI YOMKHAYA

UMKHAYA iziko lezindaba elibika ngolimi lwesiZulu izihloko ezisematheni, ezosaziwayo, ezemfundo, ezemidlalo kanye nangabantu abenza izinto ezinhle emphakathini. Sibika zonke izindaba ngokuthembeka, ngeqiniso nangobuqotho.