Izindaba

UPAPA PENNY UVALA ESABANGU-20 ABAXOSHWE I-MK PARTY EPHALAMENDE

UPAPA Penny owathusa abaningi ejoyina iqembu likaMnuz. Jacob Zuma, i-MK Party uya ephalamende ukuyovala esinye sezikhala ezivuleke emuva kokuba leli qembu lixoshe amalungu alo angamashumi amabili (20) alimele ephalamende likazwelonke.

I-MK Party ixoshe amalungu ayo ephalamende kungakapheli nezinyanga ezimbili efungisiwe njangamalungu esishayamthetho sikazwelonke. Lokhu kuvele encwadini ebhalelwe usomlomo wephalamende, uNks Thoko Didiza ngumholi weqembu ephalamende uMnuz. Sihle Magubane emazisa ngenhloso yeqembu yokuxosha laba.

Kule ncwadi emisa laba ephalamende, okuvele nokuthi sebexoshiwe naseqenjini i-MK Party kubhalwe ukuthi: Sicela ukwenza izinguquko ohlwini lwamalungu eqembu uMkhonto weSizwe ngokwesigaba 16 ukubeka inhloso yethu yokuvala izikhala ephalamende likazwelonke”.

Usomlomo wephalamende, uNks. Didiza usewabhalele lamalungu axoshiwe ewazisa ukuthi asexoshiwe iqembu lawo futhi awasafuneki nangalukhalo ephalamende.

I-MK Party ibe isithumela uhlu olunamalungu angamashumi okuvala izikhala ezivulekile emuva kokuxosha amalungu ayo. Kulolu hlu kukhona igama lika-Brian Molefe oke waba isikhulu sakwa-Eskom kanye nomculi, uPapa Penny ongu-Eric Nkovani igama lakhe langempela. UPapa Penny udume ngomculo wakhe weSishangane othandwa ngabaningi ngakubo eLimpopo.

Ungomncane ezinganeni ezingamashumi ayisithupha nesishiyagalolunye (58) ezizalwa uyise owayeyinyanga futhi eganwe amakhosikazi angamashumi amabili nanhlanu(25). Eneminyaka eyishumi nanhlanu uke wasebenza emayini i-West Driefontein eduze kwase-Carletonville Centre. Kuthe ngenxa yokunganeliseki ngezimo zokusebenza washiya, wabe esejoyina umculo kanti ingoma emenze waduma ayenze ngo-1994 ethi Shaka Bundu.

Ngokwesitatimende esithunyelwe abezindaba iqembu i-MK Party bonke laba axoshiwe babevele bazisiwe ukuthi bayabambisa, kuzothi mase kuhlelwe bese bekhishwa.

INTATHELI YOMKHAYA

UMKHAYA iziko lezindaba elibika ngolimi lwesiZulu izihloko ezisematheni, ezosaziwayo, ezemfundo, ezemidlalo kanye nangabantu abenza izinto ezinhle emphakathini. Sibika zonke izindaba ngokuthembeka, ngeqiniso nangobuqotho.