UDLELWA INDLU UTHABO QALINGE OBEGIJIMA KUMAZULU FC
INKANI yokunqaba ukuvumelana nesiphakamiso sebhange seyimholele ekutheni adlelwe indlu, uThabo Qalinge obengumdlali weqembu laKwaZulu-Natali eligijima ku-Betway Premeirship, AmaZulu FC. Kuthiwa ibhange i-Nedbank ngabameli balo iMolefe Diepu Incorporate libhalele uQalinge incwadi limazisa ukuthi kusukela ngomhlaka-1 Nhlaba nonyaka isikweletu sendlu yakhe sikhuphuke safika ku-R251 000, lamluleka ukuba akhokhe lemali ukuze abe sesimeni esikahle.
Leli bhange libe selimnika ithuba lokuthi avume limdayisele indlu ukuze kukhokheleke isikwetu sakhe kuphele abebehlangene ngakho. “Indlu izohlala emakethe izinsuku ezingamashumi ayisishiyagalolunye (90). Siyalamukela inani olivumile ukuthi kudayiswe ngalo indlu, funda incwadi esikuthumelele yona”, kuqhubeka incwadi yabameli.
Nokho lomdlali ongowodabuka eSoweto eGoli akabange esayingena eyethuba alinikwa ibhange, ngethemba lokuthi uzohlanganisa imali ngokushesha akwazi ukukhokhela isikweletu sebhange.
Okwenzekile-ke njengoba bekucaca ukuthi uyahluleka ukukhokha lemali, ibhange lakwa-Nedbank lifake amaphepha enkantolo e-Johannesburg High Court ngesonto eledlule licela inkantolo iligunyaze ukuthi lidayise indlu kaQalinge. Lokhu belikwenzela ukuthi kubuye imali yalo elayiboleka lo mdlali ngesikhathi ethenga lendlu.
Ngokwamaphepha asenkantolo i-Nedbank ithi ngomhlaka-14 Ndasa 2022 yaboleka uQalinge imali engaphezu kuka-R2.5 million ukuze athenge lendlu yakhe esendaweni yabandla izambane likapondo e-Eye of Africa enyakatho yeGoli. Kuthiwa bekumele ayibuyise lema li njalo ngenyanga ngesamba esingu-R20 000.
Ngokwemibandela yesivumelwano esibhalwe phansi, uma uQalinge ehluleka ukukhokhela ibhange, lingakwazi ukufuna yonke imali alikweleta yona ekhokhwa njalo ngenyanga noma ibhange lidayise indlu ukuze kubuye imali yalo.
“Kuphulwe isivumelwano ngoba ummangalelwa uhlulekile ukukhokha imali yezinyanga kusukela ngomhlaka-1 Nhlaba 2024, imali eyisikweletu yafika ku-R251 541.85.
“Ngokwemibandela yesikweletu ummangalelwa ubenesibopho sokukhokha imali engu-R2 659 230.76 ihlangene nenzalo engu-11.75%. Uhlulekile ukukhokha, njengamanje usekweleta isikhonzi senkantolo njengoba udaba sekufakwe kuyo”, kusho amaphepha asenkantolo.
Ibhange lifuna inkantolo ilivumele ukuthi indlu ibe semakethe.
“Inkantolo ivumelekile ukuthi igunyaze ukudayiswa kwendlu ngokomthetho 46 (1)(a)(ii) ufundwa ndawonye nomthetho 46(2)(c), futhi inkantolo inelungelo lokunquma inani okuzodayiswa ngalo”, ngokwamaphepha asenkantolo.
Lesi sicelo esifakwe ibhange enkantolo silandela esinye esifakwe abanikazi bendawo ahlala kuyo uQalinge e-Eye of Africa, sokuthi inkantolo efanayo ikhiphe imvume yokuthi indlu ifakwe endalini ngenxa yokuhluleka ukukhokhela izindleko zenyanga zokuyisebenzisa (levies).
UQalinge ubeyibamba esiswini emaqenjini afana ne-Orlando Pirates, Superspor United neMpumalanga Black Aces.
