UGWETSHIWE OTHOLWE ENECALA LOKUKHWABANISA R1MILLION

Ngu Sandile Khumalo

Ugwetshwe iminyaka eyisikhombisa owayeyisikhulu kumasipala wedolobha i-Joburg ngokutholakala enecala lokukhwabanisa. UMnuz. Sipho Machuene Dikhoba (50) obeyi-Project manager kumasipala wasegoli ugwetshwe ngemuva kokuwavuma amacala alinganiselwa kwangama-200 abebekwe wona. La macala kubalwa kuwo awokukhwabansisa udizili olinganiselwa esigidini samarandi (R 1Million).

Inkantolo yezokukhwatshaniswa kwezimali ebihleli e-Palm Ridge Magistrate Court, imugwebe iminyaka eyisikhombisa (7) uDikhoba kwase kulengiswa iminyaka eyisihlanu (5) inqobo nje uma evuma ukuthi akhokhe imali engu-R 500, 000 ngemali yakhe yomhlalaphansi. Le mali uzokhokhela ngayo obengumqashi nokunguye obemvulele icala. Lokhu kulandela ukuba uDikhoba avuma ukusebenzisana nabashushisi kulolu daba. Ukwenze lokhu ngokuthi anike ubufakazi ngaloyo abesebenzisana naye kulobu bugebengu okumanje naye usaliqula leli cala.
Umnyango wezenhlalo yabantu (Social Development) wavula icala ngemuva kokuba kwatholakala ukushayisana okwatholakala kuma-invoice kusuka ngoNcwaba 2019 kuya kuMfumfu 2020. Lokhu kwaholela ekutheni kwenziwe uphenyo obeluholwa ngu-Constable Windsor Mboweni wophiko lokushushisa olubizwa ngoKlebe.

Lolu phenyo lwathola ukuthi kunemali ebikhishwa kuthengwe ngayo udizili nsuku zonke. Okuxakayo ukuthi lo dizili wawuthengwa nje kodwa ama-generator okwakuthiwa uthengelwa wona ayengasebenzi. Ngokwesitatimende esikhishwe ngabezokushushisa, uDikhoba wesula esikhundleni emuva kokuba ethunyelelwe ubufakazi balokhu kukhwabanisa.
Ngokuthola kwaleli koMKHAYA, lo dizili owakhwabaniswa kwakufanele usetshensiwe ukukhanyisa ama-generator ezindawo ezihlala labo abanakekelwa yiwo lo mnyango. Lokhu kuphinde kwagcizelelwa nguMshushisi omkhulu obephethe leli cala ngesikhathi esonga izethulo zakhe.