Izindaba

KUDUBULEKE ABESIFAZANE ABABILI KUDUTSHULWANA E-CORNUBIA

ESEHLAKALWENI sokudubulana ngoLwesibili e-Cornubia ngaseMhlanga, kudubuleke kanzima abesifazane ababili, obeqondiwe uneminyaka engamashumi amathathu nane kanti omunye oneminyaka engamashumi amabili nane kuthiwa ubengahlangene nalesehlakalo.

Lona oneminyaka engama-34 udubuleke kabi esithweni sangasese, ezinye izinhlamvu ezimbili zangena emlenzeni wangakwesokudla. Lona wesibili udubueleke emilenzeni yomibili.

Ngokuthola koMKHAYA lona wesifazane (34) obeqondiwe ubehlala emaflethini akuyo lendawo. Kuthiwa ube nempi nowesilisa ongusomatekisi obempoqa ukuthi aphume aphele kule ndawo abehlala kuyo, kanti yena ubala engafuni ukuxoshwa.

Kuthe ntambama waqonda ngqo itekisi emhlophe i-Toyota Hiace okungekasomatekisi wayigaklaza ngocelemba. Ukwenza lokhu nje ayinamuntu phakathi. Kube sekuqhamuka imoto engaziwa abantu abebephakathi bavulela ngenhlamvu kulona wesifazane. Ngeshwa izinhlamvu zidlule zadubula lona wesifazane (24) obengaqondiwe.

Isithombe: Uyicancathe kanje itekisi amafasitela owesifazane (34) obehlala emaflethini e-Cornubia.

Bobabili balashwe endaweni yesehlakalo base bphuthunyiswa esibhedlela kukubi, nokho bekuthembisa ukuthi bazosinda. Abakwa-Reaction Unit of South Africa (RUSA) bafikile endaweni yesehlakalo ukuzolekelela njengenjwayelo.

INTATHELI YOMKHAYA

UMKHAYA iziko lezindaba elibika ngolimi lwesiZulu izihloko ezisematheni, ezosaziwayo, ezemfundo, ezemidlalo kanye nangabantu abenza izinto ezinhle emphakathini. Sibika zonke izindaba ngokuthembeka, ngeqiniso nangobuqotho.