KUPHELE IZWI LENKOSI U-PASTOR MBORO EVUKA INDLOBANE ESIKOLENI
UMFUNDISI odumile webandla i-Incredible Happenings Ministries, uPaseka ‘Pastor Mboro’ Motsoeneng utheleke engasadle nkobe zamuntu esikoleni esiseGoli, iMatshidiso Primary School esifunda abantwana bakhe ababili njengoba kubikwe ukuthi ubevele elande bona ngenkani ngoMsombuluko. UMboro ufike kulesi sikole esiseKatlehong ehamba nelinye ilungu lo mndeni wakhe.
Sekunenqwaba yama-video alesigameko esishiye abaningi bebambe ongezansi njengoba kubonakale uMboro ephethe ocelemba ababili ngesahla esabisa othisha nabanye abasebenzi bakulesiya sikole. Nokho konke lokhu kwenzeke isikole sesiphumile, kusasele othisha abambalwa nezingane ezithile.
Ngokombiko womnyango njengoba ukhishwe umkhulumeli wawo, UMnuz. Steve Mabona uthe uMboro ufike esikoleni ehamba nabanye abalisa ababili abebephethe ocelemba nezinye izikhali eziyingozi emagcekeni esikole. Ungqongqoshe womnyango wezemfundo, ezemidlalo, ubuciko namasiko eGauteng uMnuz. Matome Chiloane usigxekile lesi senzo esinodlame esenziwe ilamadoda amathathu abebeka impilo yabantu engcupheni.
“Kuyathusa, kunendoda ebonakala ithatha ngesidlozana abafundi ababili, obekubonakala sengathi impi isuke ngabo, enye ibiphethe umjojantaba kacelemba. Lesi senzo esingasile kanje asamukelekile ezikoleni ezisemiphakathini yethu”, kusho uMabona.
Uthe umbiko osemnyangweni wabo uveza kunengxabano yemindeni emibili ebanga izingane zabafana ezingabafundi kulesiya sikole, ezenza amabanga RR nebanga lesibili,
“Kuthiwa unina walabantwana washona ngoNdasa nonyaka okuyikho osekuqubule impi phakathi kwabakubo kamama nobaba walezingane. Ngosuku okwenzeka ngalo lolu daba ubaba wezingane waba nomhlangano nothishanhloko wesikole ekuseni.
“Kuthe ngokuqhubeka kosuku ugogo wezingane ozala unina wazo, naye osebenza kuso lesikole futhi osengumbheki wabantwana waba nomhlangano nothishanhloko emazisa ngokuqhubekayo emindenini yaleazi ngane. Wamazisa nangomhlangano ababe nawo ngempelasonto wokulungisa udaba lwezingane emzini kamkhulu ozala ubaba wazo izingane owagcina ungaphelanga ngenxa yokungazwani.
“Okulandele lapho ukuthi usekela thishanhloko akavumanga ukudedela lezingane ngaphandle kwemvume kagogo wazo nokuholele ukuthi uMboro afike engasadle nkobe zamuntu ehamba nabaqaphi bakhe.
“Lesi gameko senzeke emuva kokuphuma kwesikole ngesikhathi ubaba wabantwana efika esikoleni ethi uzolanda izingane ehamba nomkhulu wazo uMboro kanye nabaqaphi bakhe behlomile. Othisha abakuvumanga ukudedela izingane ngaphandle kwemvume kagogo wazo nokube sekusuka uthuthuva kwaze kwangenelela amalungu omphakathi azidlulela ngendlela”, kusho uMabona.
Uthe udaba lubikiwe emaphoyiseni, lwase lunikwa uphiko olusebenza ukuxazulula izinkinga zomndeni ukuthi lulusebenze. Uthe kuzothunyelwa ithimba labeluleki elizosiza ukululeleka othisha okungenzeka ukuthi baphazamisekile ngokomqondo emuva kwalesi gameko.
Ungqongoshe wezemfundo, ezemidlalo nobuciko usigxeke kakhulu lesi senzo, wathembisa ukuthi umnyango uzolandelela ukuqinisekisa ukuphepha kwabafundi.
“Umnyango uzokwenza isiqiniseko ukuthi ubulungiswa buyenzeka kulolu daba. Angeke sikubekezelele ukuziphatha okunje, udlame nokusabisa ezikoleni ngeke sikuvumele ngakho sizothatha izinyathelo ezinqala ukuvikela abafundi nothisha”, kusho uChiloane.