I-RICHARDS BAY ICONSELA AMATHE U-McCARTHY NOMOSIMANE
IQEMBU kakwaZulu-Natali elidlala kuBetway Premiership, i-Richards Bay FC kuzwakala ukuthi lizimisele ngokuncintisana okusezingeni eliphezulu kule-season ka2024/25. Lokhu kuza emuva kokuba lihlukane nomqeqeshi walo sekusele amasonto ambalwa ukuthi kuqale imidlalo ye-Premier Soccer League (PSL). Kuthiwa ekuhlukaneni kukaVusumuzi Vikalakazi neqembu kube into okuvunyelwene ngesihle.
Nokho kuthiwa izikhulu ze-Phakwe Gas okungabaxhasi abasha baleli qembu laKwaZulu-Natali zifuna izinkakha zabaqeqeshi, oyedwa phakathi kukaPitso Mosimane no-Benni McCarthy njengoba bobabili labaqeqeshi bengenamaqembu abawaqeqeshayo. UMosimane usanda kushiya i-Abha FC yase-Saudi Arabia, kanti u-McCarthy yena uphelelwe inkontileka ku-Manchester United yase-England ngoNhlangulana yangabe isavuselelwa.
Kuthiwa iPhakwe Gas isayine inkontileka yeminyaka emithathu ngokufaka engu-R100 million njengabaxhasi be-Richards Bay. Umphathi kaVilakazi, u-Mike Makaab ukuqinisekise emsakazweni iGagasi FM ngoMsombuluko ukuthi nebala lo mqeqeshi uhlukene ne-Bay. Ngesikhathi kwethulwa iPhakwe Gas njengabaxhasi abasha, isikhulu sayo le nkampani uThabiso Tenyane sakumemezela ukuthi kuzoba noshintsho ethimbeni laba qqeqeshi kuleli qembu.
“I-Richards Bay izowehlula amaqembu aseGoli. Sizoqinisekisa ukuthi banayo yonke into abayidingayo. Okunye okuzothusa abantu umqeqeshi”, kusho uTenyane.
“Singabaxhasi abasondele kakhulu kokwenziwa iqembu ngoba sifuna ukuba ingxenye yeqembu labanqobi. Ngakho ngifuna ukwenza isiqiniseko ukuthi bayanqoba. Uzoba khona umqeqeshi futhi uzomenyezelwa ngaphambi kokuqala i-season”, kusho yena.
Kumangazile khona ukukhululwa kukaVilakazi ngoba ubeqeda kusayina inkontileka yonyaka owodwa ne-Bay futhi ubesanda kuyivikisa ukubuyela emuva ehlathini emidlalweni yokuvika izembe ka-2023/24.